Shillong, Nohprah 11 : Kum ka sienjam ban tehlakam ia ka jinglah ban mih ka huri hura, ka District Magistrate ka East Khasi Hills Kong RM Kurbah, kala khang ia kano kano ka jingialum paidbah ha ka jaka iakajia jong ka Iingmane Presbyterian ha Ksehpyndeng.
Kane ka hukum, bala pynmih hapoh ka kyndon 163 BNSS, kala mih hadien ba mih ka jingiakajia hapdeng ki ar kynhun jong ka Balang, ha kaba kawei ka kynhun ka thmu ban pyn baptis biang ia ki nongshongshnong bala rangbah jong ka Shnong ha ka 12 tarik Nohprah 2025, kaba la pyrshah jur da kawei pat ka kynhun.
Ha ka hukum, ka Kong Kurbah kala pynpaw ba ka sngewdei ba ka jingthmu ban pyn baptis biang ka lah ban pynmih ia ka jingiakynad bad lam sha ka jingkulmar kaba ktah ia ka suk ka sain.
Ka ong ba kano kano ka jingpynkhein ia ka hukum kin shah pynsajia hapoh ka kyndon 223 jong ka BNS.
Kane ka hukum kala treikam mardor bad kan iai treikam haduh da pynmih da kawei pat ka hukum.
