Dibrugarh, Nailur 19 :Sa shisien pat uwei u doktor ula ngat ha ka jingshah thombor ha u runar u bym lah ban ithuh hapoh Tinsukia district ka Assam.
Kane ka jingjia kala jia hapoh Kakopather zonal primary health centre ha Doomdooma kaba hap hapoh Tinsukia district ka Assam.
Lyngba ki dur video na ka CCTV la iohi ia une u runar uba la wan rung hapoh ka PHC ban thombor ia utei u doktor ia uba la tip kyrteng kum u Dr Tikendrajit Sarma.
Haba kren sha ki lad pathai khubor u Dr Sarma ula ong; “Ha ka sngi Saitjain ba la lah, uwei u nongpang uba kyrteng u Kalyan Gogoi ula wan shah sumar namar ka jingshitom ha ka tynpuit kti ka mon jong u ha kane ka centre.Hadien ba nga la eksamin, nga la ong ha u ba kin ym lah ban sumar ha kane ka jaka.Ula shong ha kane ka jaka haduh kumba shiteng kynta.Kham hadien uwei u briew ula rung shapoh bad kylli mano ba dei u doktor ha kane ka jaka bad rung ha ka kamra jong nga ha ryngkat ka tim ka tla bad thap ia nga.”
“Nga la trei lah jan kumba 30 snem bad mynta Nga la ngat ha ka jingshah thombor .Nga sngewsih shibun,” ula ong shuh shuh.
Halor kane ka jingjia na ka liang une u doktor ula leit ban ujor hapoh Kakopothar police station haTinsukia district ka Assam.
Hadien kane na ka liang ki bor pulit kila pynlong ka jingthwet kaba jur ban ioh kem ia utei u runar uba donkti ha katei ka kam thombor.
Kane ka dei ruh ka sien kaba nyngkong eh ha kaba u doktor un shah ktah kti ha Assam. Kham hashwa kiba bun kiba kum kine ki jingjia kila jia na ka por sha ka por ki bynta bapher bapher kane ka jylla.
Ha ka snem 2019, uwei u doktor 73 snem rta, u Deben Dutta uba trei kum u medical officer hapoh Teok Garden ha Jorhat district ka Assam ruh ula ngat ha ka jingshah thombor.
