Agartala, Nailur 19 :Katba ka jylla ka dang pynkhreh ia ka ilekshon sha ka iingdorbar assembly, na ka liang ka sorkar synrop ba la lamkhmat da ka BJP ha Tripura kala kyntiew ia ka bai bam tymmen sha kumba 80,000 ngut ki nong ioh jingmyntoi.
Ia kane ka bai bam tymmen la kyntiew da T.1000 bad kaba la kyntiew na ka bynta ki nong ioh jingmyntoi da T.2000 marwei.
Na ka laing ka sorkar ba la lamkhmat da ka BJP ha Tripura kala pynpaw ba ka jingkyntiew ia kane ka bai bam tymmen la pynbna ha ka lyngkhuh sngi kha kaba 72 jong u Myntri Rangbahduh (PM) ka ri u Narendra Modi.
Ka BJP kala pynbna haduh 299 tylli ki jingkular hashwa ka ilekshon assembly ha ka snem 2018 bad ka jingkyntiew ia ka bai bam tymmen ka dei kawei na ki.
U Myntri Rangbah (CM) ka Tripura u Dr Manik Saha haba plie ia ki sienjam kiba iadei na ka bynta ka bha ka miat jong ki longiing longsem (Good governance at every house) ula pynbna ia katei ka rai da kaba kam ruh ba ka sorkar ba la lamkhmat da ka BJP kala dep lypa ban pynurlong ia baroh ki jingkular ilekshon ki jong ka.
“Ka jingpyntreikam ia ki kular kala kham shim por namar ka jingsynshar kaba 25 snem jong ka sorkar communist kaba la pyndkoh ia ki rukom treikam bad kaba la pynduh noh ia ki hok kaba ki riew paidbah ki dei ban ioh.Watla kata kane ka rukom treikam kam pat long kaba khuid bad kaba lah ban pyniajan bad ki paidbah bad ka ban dang shim katto katne ka por, hynrei ngi la kut jingmut ban leh ia kaba bha tam hapoh ka jingialam jong u PM Modi,” ong u CM ka Tripura.
