Pynhap pyrda u CM ia ka Jubili Ksiar jongka Nartiang Presbyterian Higher Secondary School

Shillong, Nohprah 09: Ka jingpynhap pyrda ia ka Jubili Ksiar (1975–2025) jongka Nartiang Presbyterian Higher Secondary School(NPHSS), Modop, kala long hynne ka sngi Baar, ha kab u Myntri Rangbah ka jylla u Conrad K. Sangma ula long kum u Kongsan bad u Symbud Myntri Rangbah ka jylla u Bah Sniawbhalang Dhar ula long u symbud kongsan.

Ha kane ka jingrakhe la iadonlang ki heh ki hain kiba kynthup ia u CEM ka JHADC u Bah Thombor Shiwat, u Tbn. H. Khynriam u Chairman jongka SMC, NPHSS, Modop, I.J.R. Tongper, Principal, NPHSS, Modop bad kiwei kiwei.

U Myntri Rangbah haba kren ha ka jingialang ula ong “Mynta ka sngi kane ka skul kala dap 50 snem ha ka jingiaid lynti ka jongka bad kaba dang bun ki snem kiban dang wan. Nga iaroh ia ka Nartiang Presbyterian Higher Secondary School halor ka jingnoh synniang shi katdei eh sha ka imlang sahlang bad ula pynpaw ka jingsngewnguh ia baroh kiba la noh synniang sha kane ka skul”.

Haba pynpaw halor ki kam kiba la leh da ka sorkar ha ka pule puthi naduh u snem
2018, ula ong, ba ka pule puthi kadei kaba kila pynleit jingmut bha da ka sorkar jylla bad ula ong ba ha kine ki snem kiba la dep ka jingmang tyngka ha ka pule puthi kala kiew na ka T.2000 klur sha ka T.3,500 klur kaba la long syndon kaba heh tam ha ka jylla. Ula bynrap ba kane ka jingkynshew tyngka kadei ka jingsdang ban pyni ia ka jingwanrah ia ka jingkylla kumba ka sorkar kala angnud.

“Ka pule puthi kam dei eh tang ia ki kot ne ki kyrdan, kadei ban tei ia ka jinglong. Ka ai ia ka jinglong kaba ryntih, ka jingngeit, jingieid ri bad ka jingburom ia kiba la heh la san, ban trei shitom, ka jingiengskhem bad ka jingdon ia ka jingthmu ha ka jingim. Ka pule puthi kaba shisha ka saindur ia ki khynnah sha ki riewshimet kiba don ia ka jinglong kaba khlain.”

Ula pynpaw ruh ia ka jinglong jingman jongka pule puthi ha ka jylla bad pynpaw ba “Ka Tripura, kaba don ia ka jingbun briew kaba palat 45 lak, ka don kumba 4,000 tylli ki skul. Ka Manipur, kaba don ia ka jingbun briew kaba jan iasyriem bad ka Meghalaya, ka don kumba 5,000 tylli ki skul. Ka Nagaland ka don kumba 4,000 tylli ki skul. Ka Meghalaya, ka don 14,000 tylli ki skul kaba palat haduh 10,000 ia ka Tripura. Ngi don 55,000 ngut ki nonghikai, katba ka Manipur ka don 36,000 ngut bad ka Tripura ka don 40,000 ngut watla ka don bun bha ki nongshong shnong”.

Haba kubur ia ki jingeh ban pynbeit ryntih ia ki skul, u Myntri Rangbah ula pynpaw ba kila don 206 tylli ki skul kiba dap ba biang pura ki nonghikai bad kumba 2,000 tylli ki skul ki don 5–7 ngut ki nonghikai na ka bynta tang iwei haduh 5 ngut ki khynnah skul. Ula ong ba ka jingpynbeit ryntih ka long kaba kyllain namar ba bun ki shaniah ia ka jingkamai jakpoh lyngba katei.

Ha kaba iadei bad ki jingwanrah jingkylla, u Myntri Rangbah ula ong, ba ka sorkar ka dang pynkhreh ban ai ia ka tulop kaba ryntih na ka bynta ki nonghikai Adhoc bad SSA, kaban long ka jingai jingshngain ia ka kam ka jongki, ban kiew ka tulop bad ki jingmyntoi hadien ba kila shongthait na ka kam bad ula pynpaw ia ka jingkhmih lynti ba ia kane ka rai kaba pura yn sa shim hashwa ka jingrakhe ia ka Khristmas.

Ha kaba iadei bad ki lad ia ki samla pule, ula pynbna ba ka sorkar kala khmih bniah ia ka jingdawa ia ka Science Stream ym tang ia ka NPHSS hynrei ha kylleng ia ki Higher Secondary School ban pynthikna ia ki khynnah kin lah ban bteng ban shim ia ka sobjek kaba ki sngewmon ma ki, khlem kino kino ki jingduh lad.

Ula pynbna ruh ban ai jingkyrshan ia ka NPHSS, da kaba ong, ba u dap da ka jingsngewbha ban noh synniang T.20 Lak na ka Chief Minister’s Special Development Fund ban shna pynheh ia ka skul.

Ula iathuh ba ka sorkar kala trei ryngkat bad ka Sorkar Pdeng ban kyrshan ban tei ia ki Girls Hostel, kaban plie lad ia ki kynthei ha kylleng ka jylla Meghalaya.

U Symbud Myntri Rangbah u Bah Sniawbhalang Dhar ula pynpaw halor ka jingiaid lynti ka skul bad ula ong, “Kane ka jingiaid lynti kam long kaba suk. Kila don ki jingeh bad don ki por ba ka skul kala mad ia ka jingeh hynrei lyngba ka jingtrei shitom jong ka shnong, nonghikai bad ka managing committee, ngi lah poi sha kane ka khyllipmat jong ka jinglehkmen. Ngi kyrmen ba ki khynnah pule kane ka skul, kin kylla long ki doctor, engineer, nongialam bad ki riewshimet kiba seisoh kiban wanrah ia ka jingsngewsarong ia ka shnong jong ngi”.

Ha kane ka jingialang la pyllait paitbah ia ka kot sahkynmaw ne ka Golden Jubilee Souvenir bad la pyninam ruh ia ki bynta kiba iadei bad ka kolshor lyngba ki jingrwai jingshad bapher kiba la iashimbynta da ki khynnah skul.