Shillong, Nailur 19: Ki samla ba iakhun kam pulit ha ka jylla hynne ka sngi nyngkong, ki la mih ban shong kyllaiñ myngor hakhmat ophis MBoSE ban dawa na ka sorkar jylla ba kan pynbna noh ia ka result written test ba ki la dep ban thoh naduh u bnai Rymphang mynta u snem.
Haba kren bad ki lad pathai khubor kitei ki samla ki la pynpaw ba ka jingmih jong ki ban wan shong kyllaiñ myngor kadei namar ba wat hadien 7 bnai ruh ka sorkar ka sngap man man haba iadei bad katei ka result.
“Ngim donlad shuh da kumwei pat dei na kane ka daw ngim banse ban mih da kaba shong kyllaiñ myngor,” ong u Bah Shine Marwein.
La iathuh ruh ba ki don haduh kumba 3000 ngut ei ei ki samla ba ap ia katei ka result bad baroh mynta ki la shu lynga namarba na ka sorkar kim ai ktien lane pyntip lano ba kin pyllait noh ia ka result.
“Lada ngi pass ne ngi fail ngi kwah ban tip ia ka result khnang ba ngin lah ban wad kam noh shawei ruh,” bynrap sa u samla D Lyngdoh.
Kitei ki samla ki la iathuh ruh ba ka jingpynslem jong ka sorkar ban pyntip ia ka result kam ktah tang ia ka bor bad ka por ba ki pynlut ban mareh ne thoh eksam hynrei ka ktah wat ia ka rta wad kam namar mynta la saw snem ka kam ka dang sahteng.
