Shillong, Nailur 19 : U Amar Nath Sharma u la ioh ban khur ia ka nam lahduh ha ka jingialehkai jong ka All Shillong Open Snooker Tournament ba la pynlong da ka Meghalaya Billiards and Snooker Championship ryngkat ka jingiatreilang bad ka National People’s Youth Front Shillong City hynin ka sngi.
U lahduh ha katei ka jingialehkai u ioh ban khur ia ka song pisa kaba 50 hajar tyngka katba u samla Jexial Nongkynrih uba wan baar u ioh ban khur ia ka song pisa ba 30 hajar tyngka ryngkat ka khusnam.
Ia katei ka jingialehkai la wan ban sakhi lang da u Myntri ka Koit ka Khiah ka Jylla James K Sangma, MLA Ka Shillong East Dr. Ampareen Lyngdoh, kyrtong NPP na Nongthymmai Dr Jasmine Lyngdoh bad kyrtong NPP na Shillong North Bah Ransom Sutnga nalor ki nongialam ka NPYF bad Meghalaya Billiards and Snooker Association.
U Myntri kumjuh ka Dr Ampareen ki la ai ka jingiaroh ia ki bor pyniaid kumjuh ia ka NPYF kiba la snohkti lang ban pynlong ia katei ka jingialehkai ba pawnam ha kylleng ki ri ka pyrthei.
Ka Dr Ampareen ka ai ka jingiaroh ba ki bor pyniaid ki ailad lang ruh ia ki samla kynthei ba kin shim bynta lang.
Baroh lang ki la don haduh 48 ngut ki nongialehkai kiba wan ban shim bynta ha katei ka jingialehkai kaba sdang naduh ka sngi Balang jong ka taiew ba la dep.
