Guwahati, Nohprah 8: Ka jylla Assam kala sdang ia ka jingkhynra ban pynduh jait ia ka jingpyniathoh khynnah ha kylleng ki 30 tylli ki district kiba don hapdeng ka jingma ne ka high-risk, bad ban pynlong ruh kum kawei na ki jylla hapoh ka ri ka ban iakhun pyrshah ia kum kane ka jingleh.
Katba ka sorkar kmie ka la buh ia ka thong ba ha u snem 2030 kum ka ri ban pynkut noh ia ka jingshongkha khynnah, u Myntri Rangbah ka jylla u Himanta Biswa Sarma u la buh por kham kloi, da kaba pynbna ba ka Assam ka thmu ban pynduh jait ia kane ka jingeh ha u snem 2026. Ka jylla ka don 35 tylli ki district, ha kaba 30 tylli district ki don hapdeng kiba hap ban khmih bniah bha.
Kane ka campaign ba thymmai, kadei ka jingsdang ne ka jingthmu jong ka ri hi baroh kawei ia kaba la lam khmat da ka Just Rights for Children (JRC)—kaba dei ka jingiatrei lang hapdeng ki kynhun seng trei mon sngewsbha bad ki shnat trei kam jong ka sorkar—da ka jingthmu ban pynkylla ia ki shi lak tylli ki shnong ha kylleng ka ri India sha ki shnong ba lait na ka jingshongkha khynnah.
Ka Assam ka la don ha ka record ba ka long kawei na ki jylla kaba bun tam ka jingshongkha khynnah ha ka ri. Katkum ka NFHS-5 (2019–21), 31.8% na ki kynthei kiba don ha ka rta 20–24 snem ha ka jylla ki la shongkurim shwa ban dap 18 snem, kaba kham heh bha ban ïa ka jingkheiñ kyllum ha ka ri baroh kawei ka long 23.3%. Ka Dhubri ka don ha khlieh duh ha kane ka thup da palat 50%, katba ki distrik kum ka South Salmara-Mankachar, Darrang, Nagaon, Goalpara, Bongaigaon bad Barpeta ki don palat ia ka 40%.
Naduh ba la sdang ia kane ka jingiakhun pyrshah, kaba la sdang ha u snem 2023 hapoh jong ka jylla, ki Pulit Assam ki la kem palat 8,600 ngut ki briew—kham bun ki shynrang—ha kaba ïadei bad ki kam shongkha khynnah.
Katkum ka jingong u Myntri Rangbah ka Jylla, palat 3,000 tylli ki jingshong kha khynnah la khanglad ha kane ka por, ka la hiar da 8.17% ha ki distrik ne ki jaka ba long “hotspot”. Ki bor synshar ki ong ba ka jingeh kaba dang iai bteng kadei ha ki jaka ba la bun ne long trai da ki Muslim kiba kren Bengali bad ki jaitbynriew riewlum.
U Bhuwan Ribhu, nongseng ia ka JRC, u la ong ba ia kane ka plan thymmai yn pyntreikam ha kylleng ka jylla, ki distrik bad ki shnong ha ki lai tylli ki bynta: kaba kynthup ia ka jingpynsngewthuh paidbah ha ki jaka pule; ka jingpyn sngewthuh lyngba ki niam bad ki nongpynbiang jong ka jingshakri kiba iadei bad ka jingshongkha; bad ka jingiadei kaba kham jylliew bad ki gram panchayats bad ki municipal wards.
