Shillong, Nailur 17 : Ki samla ba ap ia ka result kam pulit ha ka jylla hynne ka sngi ki la pynbna ba ki la ioh jingbit na ka Ophis ka Deputy Commissioner ka East Khasi Hills ba kin pynlong da ka jingshong kyllain myngor ha ka sngi Nyngkong ban kyrpad ia ka sorkar ban pyllait noh ia ka result kam pulit.
Ha ka jingkren bad ki lad pathai khubor, u samla B Marwein wei na ki samla ba iakhun kam pulit u la iathuh ba katei ka jingshong kyllain myngor ka long ban pynkynmaw biang ia ka sorkar ba mynta la kumba 7 bnai naduh ba ki thoh ia ka written test kim pat ioh satia ia ka result.
“Ka rai ba ngi shim ban shong kyllaiñ myngor kadei ba ngi kwah ban pynkynmaw biang ia ka sorkar ba ngi la ap slem ia ka result naduh ba ngi dep ban thoh ia ka written test. Kumta lada ngi pass ne ngim pass ngi kwah ban tip ia ka result,”u la ong da kaba kyntu ia ki samla ba ap ia katei ka result kam pulit ban wan lang ha katei ka jingshong kyllain myngor kaban long hakhmat ka Ophis MBoSE.
Katkum ka jingiathuh jong u ki don haduh kumba 3000 ngut ki samla ba la pyndep ia ka written test kiba ap ia ka result ba ka sorkar kam pat pynbna haduh mynta.
“Na ka liang ka DC East Khasi Hills ki la pyntip ban pynduna briew katba lah ha katei ka sngi,” u la iathuh bad ong ba kin burom katba lah ia katei ki kyndon ba la buh da ki bor distrik.
