Shillong, Naiwieng 25 : U Myntri Sorkar bad Nongialam ka UDP Bah Lahkmen Rymbui ula pynpaw ia ka jing donkam ba ka Sorkar Jylla kan pyniew noh ia ka song pisa na ka bynta ban pyntreikam ia ki MLA skhim haba ban jur ba ka jingai ba mynta ka dang duna ban lah pynbiang ia ki jingdonkam ba bun jong ki paidbah.
“Ha ka jingshisha, ia ka MLA skhim dei ban pynkiew noh ym ban pynsah katjuh tang T.2.5 klur. Kane ka dei namar ki MLA ki hap ban pynbiang iabun ki jingdonkam jong ki paidbah” ong u Bah Rymbui haba iakren bad ki nongthoh khubor ha ka sngi Ba-ar.
Ula pynksan ia ka jingpyntreikam ia ki MLA skhim, haba khein bym donkam ia ka jingdawa ban don ka jingtohkit ba laitluid da kaba ong “Kam dei ka pisa shimet jong ki MLA, ka dei na ka bynta ka jingbha u paidbah. Kumta, baroh ki MLA kila sam ia ka, kila pyntreikam ia ki skhim hala ki jong ki constituency”.
Hynrei ula kdew pat ia ki jingeh na ka jingpynslem ban pyllait ia ka pisa n aka daw jong ka jingpynkynriah kami a ki engineer bad jingmang pisa slem.
“Kum ma nga, ki don katto katne ki skhim, kiba naduh u 2023-24, kiba bun kila pyndep bad don kiba dang pyntrei ia ki. Hateng hateng namar ka jingslem ban aiti ia ka jingmang tyngka, don pat ki por ba ia ka mang tyngka kaba hap ban mynjur da u Executive Engineer ka DRDA namar ka jingpynkynriah kam khari khari ia ki Engineer ha ki District, kane kala pynslem ia ka kam” ong u Bah Rymbui haba iaroh ia ka jingpybeit ba dang shen ba ki Deputy Commissioner ki la lahban pyndonkam mynta ia kino kino ki district Executive Engieer (lada ka shuki EE ka DRDA ka thylli) ban pynsted ia ki jingai jingmynjur.
“Namar kata, shimet hi, lada phi ong ia kata, ngi donkam ym tang T.2.5 klur hynrei ngi donkam kham bun ban lah pynbiang ia ka jingdonkam u paidbah hynrei ka jingkhein jingdiah ka dei ban don namar kam dei ka pisa shimet jong uno uno u MLA, ka dei ka pisa na ka pla tyngka ka Sorkar na ka bynta ka bha ka miat ki paidbah ha ki constituency bapher bapher” ula ong.
