Shillong, Naiwieng 25 : Ka District Magistrate ka East Khasi Hills Kong RM Kurbah kala pynjari da ka korphiw miet ha shilynter ka khappud ka East Khasi Hills District bad ka Bangladesh ban tehlakam ia ka jingwan rung ki riewkiengatiar, ki runar, ki nongkhaii tuh bad ki kam runar ha khappud.
Kane ka korphiw miet kan treikam hapoh u radius ba 1 km na zero line, ka ban sdang naduh ka por 8 baje mynmiet haduh ka por 6 baje mynstep. La pyntip ba kane ka jingpynjari kan treikam haduh arbnai kynthih.
Kat kum ka hukum, ka DM ka la ong ba namar ka jinglong jingman ba mynta ha ri Bangladesh, ka lah ban don ka jingwan rung tuh ki riew runar, ki dkhot jong ki seng kiengatiar , ki nongkhaii tuh bad kino kino ki kam pyntriem ha ki shnong khappud ka India-Bangladesh.
Kala ong “Naba katto katne ki khappud ka EKH ki dei kiba dang tlot ka jingpahara bad kiba jur haka jingwan rung tuh ki mynder ri, ki riew runar bad ki dkhot ki sengkiengatiar kiba lah ban ialum bun briew ha khappud ha ka por mynmiet ban bteng ia ki kam pyntriem”.
Ka hukum kala khang ia ka iaid ki ieng ki briew kiba don jingthmu ban jam ia ka khappud ha kine ki kynta ba don ka korphiw, ban ialum briew ba 5 ngut ne palat bad ban iarah ia ki tiar pynmynsaw ha khappud nalor ki kam beain kynthup ka jingkhaii ia ki masi, kwai tympew, ki mar khaii, ki biri, sikret , slasha bad kiwei kiwei.
Ka District Magistrate kala pyntip ba kane ka hukum kan treikam noh mardor bad kan neh 2 bnai naduh ba pynmih ia kane ka hukum.
