Shillong, Naiwieng 23 : Ka Dorbar Shnong Mukroh Pyllun ha ka sngi Saitjain kala dawa ia ka Sorkar Pdeng ba kan pynsted noh ia ka jingtohkit ka Central Bureau of Investigation (CBI) halor ka jingshah siat iap ki 5 ngut ki riew paidbah ha ki Pulit Assam, kaba jia ha ka 22 tarik Naiwieng 2022.
Ha ka kyrwoh, ka Dorbar Shnong kala ong “Ngi ki nongshongshnong ka Shnong Mukroh, ngi kynmaw burom ia ka sngi iap ki 5 ngut ki para nongshongshnong da ka jingkhia ka mynsiem bad jingsngewsih”.
Ka ong ba ki san ngut ki nongshongshnong ba kyrteng Tal Nartiang, Sik Talang, Nikhasi Dhar, Shirup Sumer bad Thal Shadap, kila duh ia la ka jingim ha ki kuli jong ki Pulit ka Assam myn ha ka 22 tarik Naiwieng 2022.
Kane ka jingjia klaa jia namar ka jingiakajia pud kaba la neh slem bha hapdeng ka Assam bad ka Meghalaya, ha kaba ka Assam kala kyntur shapoh u pud u sam ka Meghalaya ha ka shnong Mukroh.
“Ngi dawa ia ka Sorkar India ba kan sngewbha ban tuklar ha kaban pynbeit noh ia kane ka jingiakajia pud hapdeng ka Assam bad Meghalaya bad ban bthah ruh ia ka Jylla Assam ba kan sangeh syndon ia ka jingkyntur jubor sha ka Jylla Meghalaya ha Mukroh tad haduh ban da lah pynbeit ia u pud u sam jong ki ar jylla” ong ka kyrwoh.
Ka Dorbar Shnong kala pynpaw ia ka jingsngewsih ba wat hapdeng ka jingmynjur da ka Sorkar Pdeng bad ki Sorkar jong ki ar jylla, ka jingtohkit CBI kam pat poi shano shano ruh, kaba la nang pyn pang mynsiem ia ki longiing kiba shah ktah.
“Ha ka 22 tarik Naiwieng, 2025, ngi ki nongshongshnong ka shnong Mukroh ngi shim ia ka rai ban dawa ia ka Sorkar India ba kan pynkloi noh ia ka jingtohkit CBI halor ka jingsynreit kuli ki Pulit Assam ba jia ha ka 22 tarik Naiwieng 2022 ha shnong Mukroh kaba don ha khappud ka Meghalaya-Assam bad ban ai ia ka jingbishar ba hok ia ki longiing ba shah ktah” kala ong.
“Ngi kyrmen ba ka Sorkar India kan sngap ia ki jingkyrpad rit jong ngi bad ai ha ngi ia ka jingbishar kaba hok bad kan ym pynbor ia ngi ban iaid lait na ka lynti jong ka hok” pynkut ka Dorbar Shnong.
 halor ka jingshah siat iap ki 5 ngut ki riew paidbah ha ki Pulit Assam, kaba jia ha ka 22 tarik Naiwieng 2022.){kind=link}