Shillong, Naiwieng 20 : Ki Pulit ka East Khasi Hills kila kem ia uwei u samla ba 25 snem na Kamrup, Assam, uba sah mynta ha Nongshilliang, namar ka jingleit tur bad kiew halor ka rynsan ka tamasa Shillong Cherry Blossom 2025.
U Superintendent of Police ka East Khasi Hills Bah Vivek Syiem ula pynthikna ia kane ka jingkem ha ka sngi Palei bad ong “La kem ia u namar ka jingtam pud (ha ka tamasa)”.
Kat kum ka jingong ki Pulit, ki nongpyniaid ka tamasa kila ujor da ka ejahar pyrshah ia une u samla.
Une u samla ula tur bad kiew halor ka rynsan ha ka por ba dang rwai u nongrwai Hip-Hop ba pawnam ka pyrthei u Tyga, kaba pynlong ia u security guard ban ioh lymbub ia une u nongrwai uba la kyllon halor ka rynsan.
La kynnoh ruh ba une u briew u dei uba la ju leh teng ia ka kam rung tuh : la kynnoh ba ula rung tuh ha ka Shillong Cherry Blossom Festival 2024 da kaba rung na ka jaka ba duna ka jingker bad ruh ula ioh rung ruh ha ka concert u Ed Sheeran da kaba ak kum u security guard.
