Shillong, Naiwieng 20 : U Myntri ka Tnad Jngohkai Timothy D Shira ha ka sngi Palei, ula pynbna ba ka Sorkar kala shna mynta iaka madan ba shirta ban pynlong ia ka tamasa Cherry Blossom shabar ka sor Shillong.
“Mynta ka madan ba shirta ban pynlong ia ka Cherry Blossom Festival ka dang iaid shabar ka Shillong. Namar ba ka dang don hapdeng ka jingtei, nga tharai ba tang mynta u snem hi, ia ka tamasa la pynlong ha Shillong namar ngi don ia ka jaka kaba biang kum ka JN Stadium” ong u Shira haba jubab ia ka jingkylli halor ka jingshah pynrem ka Sorkar ba pynlong ia ka tamasa ha Shillong kaba khapngiah.
Ula bynrap “Ki jingpynrem kin don beit man ka por, haba phi leh ia ka kam kaba bha ruh ka jingpynrem kan don beit, haba phi leh ia ki kam sniew ruh ki jingpynrem kin don. Ngim kynnoh ia kito kiba pynrem ia ngi ruh, ai ba kin pynrem katba ki mon. Ki san tylli ki shympriah kti kim long kumjuh. Lehse don kiba sngewtynnad ia ki dur jingtem….ki don bun jait ki briew ba sngewtynnad hala ki jong ki jingsngewtynnad bad ki jingtem”.
U Myntri ula niew ia kane ka tamasa Cherry Blossom mynta u snem kum kaba jop, haba pynpaw ia ka jingwan tuid ki briew ba napoh ka Jylla bad kiba na shabar ruh kumjuh.
“Nga dei ban ong ba ka dei kaba jop namar ngi la ioh bun ki nongwan bad bun ki nongshang kai pyrthei ruh kila wan na shabar ka Jylla ban iadonlang ha ka tamasa Cherry Blossom. Ngam donkam…nga hap ban shim ia ka kaiphod halor ka jingdon ki briew ba wan sha ka tamasa” ula pynpaw.
Haba iadei bad ka Megong Festival ban wan, u Shira ula ong ba ka jingpynkhreh ia ka madan kala iaid shakhmat hapdeng ka Williamnagar bad Jengjal, hajan ka surok National Highway-51.
“Kan dei ka madan ka ban neh shirta. Kan don hapdeng ka Williamnahar bad Jengjal hajan ka National Highway 51. Ia ka tamasa yn sa pynlong ha kane ka madan ba shirta mynta u snem. Ka jingpyntrei ka dang iaid shakhmat bad lehse kumba 75 % na ki kam kila dep bad nga tharai ba ngin lah pynlong ia ka Megong festival ha kane ka jaka” ula ong.
Haba iadei bad ki nongrwai na shabar ka Ri ki ban wan tem ha ka Megong festival, ula ong “Ngan dang ban ioh jingtip ia kane…kila don ki jingtyrwa ban wan ialam ia ki kynhun nongtem nabar ka Ri ruh”.
