Shillong, Naiwieng 19: U Myntri Rangbah ka jylla Conrad K Sangma ula pynpaw ba ka sorkar jylla ka iengskhem ha ka jingkular ban pynkhlain ia ka pule puthi bad ong ba ka jingkynshew tyngka kaba khraw eh, kaba lah ban leh ha kano kano ka imlang sahlang ka dei ka jingpynroi ia ka sap ki briew bad ka jingtei ia ki surok ne ia kino kino ki jingtei ki long kiba don jingmut tang khyndiat eh lada kam kyntiew ia ki briew.
Ula kren ia kane ka ha ka jingplie ia ka jingialang jong ka Ramakrishna Mission College, Sohra, kum ka jingseng ia ka Ramakrishna Mission college kaba nyngkong eh hapoh ka thain Shatei Lammihngi ka ri.
Kane ka college kan sdang ai jinghikai ha ka Arts bad Science bad da ka jingthmu ban plié lad ia ki khynnah ban ioh ia ka jingpule ha ka dor kaba biang ha ki jingpule ha ki kyrdan kiba heh ia ki samla ka thain Sohra bad ia ki thain kiba don marjan.
U Myntri Rangbah ula pynpaw ia ka jingmih ki kynrum kynram bad ia ki jingtynjuh ha kaba iadei bad ka pule puthi ha kine ki phew snem kiba la leit hapoh ka jylla Meghalaya bad ka iathuh, ba ka jylla ka pynlut haduh 15% na ka jingmang tyngka jong u snem kaba kot ia ka T.3,600 Klur ha ka pule puthi.
Ula pyntip ha ka jingialang ba ka sorkar kala sdang ia ki kam ki jam ban pynbeit ryntih ia ki skul bad ka dang trei ban don kyrpang ka jingpynwandur ban kyrshan ia ki skul Ad-hoc bad nonghikai SSA, khnang ba yn lah ban wanrah ia ka jingiaid beit bad ka jingskhem kaba khraw ha ka rukom treikam.
Ula kyntu ia ki nonghikai bad ia baroh kiba donbynta lang ha ka kam, ban buh hapdeng eh ia ki khynnah haba ki shim ia kano kano ka rai bad ula banjur ba ka lawei jong ka pule puthi ha Meghalaya kan shong eh ha ka jingshimlang ia ka jingkitkhlieh da baroh ban leh ia kaei kaei kaba bha tam na ka bynta ki khynnah.
U Myntri Rangbah ula pynthikna ruh ia ka Ramakrishna Mission ba ka sorkar kan ai ia ka jingkyrshan kaba pura bad ka pynbna ba ha kaba iadei bad ka jingpynbiang ia ka bording elektrik, yn sa pynbiang na ka bynta baroh ki skul sorkar, shimet, deficit bad ad-hoc, da kaba iaid da ka mishon bad yn shimkhia ruh ia ka jingeh kaba mad da ki jaka pule ha kaba iadei bad ka jingbym biang ki surok.
Ula pynshlur ruh ia ki khynnah pule ba kidei ban batskhem ia ka jingkordor ban trei shitom, sngewnguh, jingdon akor bad ban don ia ka jingthmu bad ka ong, ba kine kidei ki mawnongrim jong ki nongshong shnong kiba don ia ka jingkitkhlieh bad ki jinglong kiba kongsan katkum ki jinghikai jong u Swami Vivekananda.
U Swami Achyuteshananda, haba kren ha ka jingialang ula pynpaw ba kane ka jingplie kadei ka histori ha ka thain shatei lammihngi jong ka ri bad ula ong ba ka histori ka kynmaw tang ia kiba nyngkong eh bad ba ka Ramakrishna Mission college kaba nyngkong eh ha ka thain kadei kaba la plié hapoh ka jingialam u Myntri Rangbah u Conrad K Sangma.
Ula iaroh ia ka sorkar Meghalaya halor ka jingbatskhem ia ka jingkular na ka bynta ka pule puthi ha ki thain nongkyndong bad ki jaka lum bad ula pynpaw ia ka jingskhem jingmut ba kane ka college ka bathymmai kan iarap shibun ha kaban pynduna ia ka leit ka wan, ka jingshem jingeh ha ka ioh ka kot bad ka jingiehnoh shiteng por ia ka jingpule. Ula bynrap ba ka College kan ym ai tang ka jinghikai hynrei kan saindur ban long ki nongshong shnong kiba don ia ka jingkitkhlieh, ban don ia ka mynsiem ban shakri, ka jingkhlain bad ka jingsngewrit.
Haba pynkynmaw ia ki nongrim jong u Swami Vivekananda, ula iengskhem ba ka Mission ka don jingthmu ban pyniar ia ka jingnoh synniang ha Meghalaya da kaba iatreilang ha ka pule puthi, ka jingai jinghikai ia ki nonghikai, ki prokram bad ki sienjam kiban iaid ryngkat bad ka jingangnud jong ki samla ka thain.
Ki khynnah pule kila pyni ruh ia ka sap ka jongki ha ka jingleh ia ka Drill, Yoga, jingkilan met bad kiwei kiwei ki jingleh tynrai kiba pyni ia ka jingdon ia ka jinglong ryntih, ka jingtreilang kum ka kynhun bad ka jingbit jingbiang ha ka met ka phad.
Ha kane ka jingplie, ka kynthup ia ka jingplie ia u maw sah kyrteng bad ka jingpyninam ia ka kolshor.
Ha kane ka jingialang la wan iashimbynta da ki heh jongka Ramakrishna Mission kiba kynthup ia u Swami Achyuteshananda u Trustee jongka Ramakrishna Math & Mission, Belur Math, u Swami Anuragananda uba long u nongmihkhmat paidbah, u Bah Balajied Kupar Synrem u MLA ka Shella, Bah Gavin Miguel Mylliem u MLA ka Sohra, ki nongialam shnong bad kiwei kiwei.
