Shillong, Naiwieng 19: U MLA barim ka South Tura constituency u John Leslee K Sangma hynne ka sngi u la pyniasoh biang ialade sha ka Congress hashwa ka ilekshon Garo Hills Autonomous District Council (GHADC) 2026.
Haba pdiang sngewbha ia u John Leslee, u president ka MPCC u Bah Vincent H Pala u la ong “Ngi sngewkmen ban pdiang sngewbha ïa u John Leslee K Sangma sha ka iing ka sem jong ka Congress. Ka jingwanphai biang jong u ka long ka khubor shaka BJP bad NPP ba wanrah ka Politics jong ka jingiapher hapoh ka thaiñ Garo Hills. Ka jingwanphai jong u ka dei ruh ka sienjam baka Congress kala khlaiñ biang mynta. Ka jingshem phang jong u bad ka jingiajan jong u bad ki paidbah kan nang pynkhlain shuh shuh iaka Congress ha Garo Hills”.
U John Leslee K Sangma uba la don teng bad ka United Democratic Party (UDP), udei u nongmihkhmat paidbah uba ioh bha ka burom bad uba kren na ka bynta ka hok bad ka jingangnud jong ki ri lum Garo.
Hadien ka jingiasyllok bad ka jingiapyrkhat jylliew bad ki riew rangbah, ki nongkyrshan, bad ki kynhun kynhun bapher bapher, u John Leslee K Sangma u la jied ban leit phai biang sha ka Congress da kaba kam baka Congress kadei ka rynsan sain pyrthei kaba tang ma ka kaba dang iai bteng ban ieng skhem halor ki jinglong jong ka synshar paidbah bad ki hok jong ki jaitbynriew.
Haba ïakren bad ki nongïalam ka MPCC, u John Leslee K Sangma u la pynpaw ïa ka jingsngewkhia kaba jur halor ka jingeh kaba la nang jur ha Garo Hills bad u la kdew ba ki samla ki ïakynduh ïa ka lawei kaba dum, da ka jingbym don kam don jam, ka jingduh jingkyrmen, bad ki lad ki lynti ban kyntiew para breiw kila nang duna.
 2026.){kind=link}