Shillong, Naiwieng 19: U Election Commissioner ka India Dr. Sukhbir Singh Sandhu ryngkat ka jingsynran lang ka kurim, kila leit jngoh ia ka jaka kyntang kaba don ha u Lum Sohpetbneng hynne ka Sngi Balang.
La synran ia u Dr Sukhbir da ki heh ophisar kiba kynthup ia u Deputy Commissioner ka Ri Bhoi District Abhilash Baranwal bad u Dr. BDR Tiwari, u Chief Electoral Officer ka jylla Meghalaya.
Mar ia poi, la pdiang sngewbha ia u Dr Sandhu da ki rangbah bad ki nongmihkhmat jongka Seng Khasi SengKmie kiba kynthup ia u Bah DL Nongbri (Vice President), PB Synrem (Assistant General Secretary), ki dkhot jongka Jylli Pyrkhat Kam bad ka Lum Sohpetbneng Committee.
U Election Commissioner ula leit sha ka jaka ba kyntang ne Sacred Sanctum Sanctorum ban buh jingduwai kyrpang bad ban pan ia ka jingkyrkhu na u Blei nongbuh nongthaw.
Nalor kane ula iakren ruh bad ki rangbah jong ka Seng Khasi ha kaba kila ai sngewbha ruh ia u Dr Sukhbir ia ka kot kaba batai ia ka jinglong kyrpang jong u Lum Sohpetbneng bad ka rukom im jong ki Khasi.
U Dr Sandhu ula iakren bniah ha kaba iadei bad ka jinglong kongsan jong ka kolshor bad ia ka jinglong bad ka jingdon nam jong kane ka jaka kyntang.
Ula ai khublei ia ka jingriewspah jong ka riti ka dustur bad ia ki jinglong kiba kordor kiba la bat bad pynneh pynsah da ka Seng Khasi.
