Shillong, Naiwieng 19 : U Myntri ka Tnad Public Health Engineering (PHE) Marcuise N Marak ha ka sngi Balang, ula pynbna ia ka jingjop ha ka jingplie bad ka jingtest ia ka Greater Shillong Water Supply Scheme (GSWSS) Phase-III.
Haba kren na ka jaka plie, u Marak ula ong ba kane ka project, bala mang pisa ha u snem 2008, khatduh kala poi ha ka bynta ka jingpyntreikam noh, kaba long hadien 17 snem.
“Ia kane ka project la mang naduh u snem 2008 bad mynta ka sngi, ha u Naiwieng 2025, ngi la plie bad test ia ka” ong u Marak.
“Da kane ka jingplie, ngi la lah ban pynioh um sa 8 million liter shi sngi (MLD) ia ka Greater Shillong Water Supply Scheme na ka bynta ka nongbah Shillong”.
Ula bynrap ba ka Stage-1 jong ka kor pump la dep ban plie bad test bad kane ka dei ka dak ka jingsdang ka jingtreikam ka Stage-II, ka ban pump ia ka um sha ka treatment plant ha Mawphlang.
U Marak ula ai khublei ruh ia u Myntri Rangbah ka Jylla Conrad K Sangma namar ka jingshimkhia bha ban shong bishar kam halor kane ka project bad kyrshan ia ka Tnad ha man ki bynta.
“Nga pynpaw ka jingsngewnguh ia u Chief Secretary barim Bah DP Wahlang, uba la trei shitom bha halor kane ka project bad da ka jingkyrshan jong u, ngi la lah ban thied ia katto katne ki jaka kiba long ki diengpynkieng ha ka ban pyndep ia ka project” ula ong bad bynrap “Nga sngewtynnad ban pyntipsha baroh ba mynta ka sngi ngi la lah ban plie bad test ia ka GSWSS-III. Nga kwah ban ai khublei ia ka kynhun u Chief Engineer, u Commissioner & Secretary bad baroh ki Ophisar kiba la trei khlem shongthait hangne”.
U Marak ula ai ruh ka jingkhublei ia ka synniang jong ki Chief Engineer barim ka PHE bad baroh ki kynhun ba don bynta ha kaban lah pyndep ia kane ka project.
 Marcuise N Marak ha ka sngi Balang, ula pynbna ia ka jingjop ha ka jingplie bad ka jingtest ia ka Greater Shillong Water Supply Scheme (GSWSS) Phase-III.){kind=link}