Shillong, Nailur 16 :U Myntri ka Tnad Community & Rural Development (C&RD) ka Jylla Bah Hamletson Dohling hynne ka sngi Thohdieng, ula pyntip ba ka Sorkar Jylla ka dang shong bishar ia palat 19 tylli ki shithi dawa pynkha thymmai ia ki C&RD Block hapoh ka Jylla.
“Ngi la ioh pdiang ia shibun ki jingtyrwa, 19 tylli ki don bad kane ka kam ka dang don hapdeng ka jingbishar jong ka Sorkar” iathuh u Bah Hamlet hapoh ka Iingdorbar.
Kine ki kynthup ia ka Mawsaw (West Khasi Hills), Nartiang, Namdong (West Jaintia Hills), Lumshnong, Wapung (East Jaintia Hills) bad kiwei kiwei.
U Myntri ula kular ruh ban shong bishar ia ka jingkyrpad jong u MLA ka Salmanpara u Winnerson D Sangma ban pynkha ia ka Block ba thymmai ha Purakhasia, kaba hap mynta hapoh ka Dalu Block. U Myntri ula ong pat ba um pat ioh satia ia kano kano ka jingtyrwa na u MLA halor kane ka kam.
U MLA ka Nongkrem Bah Lambor Malngiang bad MLA ka Nongpoh Bah Mayralborn Syiem, kila kyrpad ia ka Sorkar Jylla ban mynjur ha kaban pynkha ia ka Nongkrem Block bad ka Umden Block ia kaba u Myntri ula kular ba ka Tnad kan sa khmih ia kine ki jingtyrwa.
Kat kum ka jingong jong u Myntri, ka sorkar ka donkam haduh T. 12 klur ban pynkha ia ka Block ba thymmai.
