Shillong, Nailur 16 : U Myntri Rangbah ka Jylla Conrad Kongkal Sangma hynne ka sngi Thohdieng, ula pyntip ba ka Sorkar ka dang lum ia ki jingkhein halor ka jingdon jong ki kam ba lait thylli hapoh ka Jylla bad ong “Ngam lah ban shu ai jingkhein ba ka bym thikna namar ngam lah ban ialam bakla ia ka Iingdorbar”.
U Myntri Rangbah ula kren ia kane haba jubab ia ka jingkynnoh jong ki Dkhot ka Liang Pyrshah na ka All India Trinamool Congress (AITC) ba ka Sorkar Jylla kam lah satia ban ai jingtip ia ka jingdon jong ki kam ba lait thylli ha ki Tnad bapher bapher ha kine ki san snem bala leit noh.
Kane ka jingkynnoh kala mih halor ka jubab jong u Myntri Rangbah ia ka jingkylli bala wanrah da u MLA ka Umroi Bah George B Lyngdoh ba ong ba u dang lum jingkhein halor ka jingdon ki kam ba lait thylli ha ki Tnad bapher bapher naduh u snem 2018 haduh 2022.
U MLA ka Rangsakona Zenith Sangma ula ong “Na ka jubab, ka Sorkar kala kiar khnang ban ai ia ki jingtip”.
Haba kynthoh ia kane, u Conrad ula ong ba u Dkhot u lah ban shu pyntip antad kat kaba u mon hynrei “Nga te ngam lah namar donkam ban hap lum ia kine ki jingtip na ki Directorate bad ki Ophis jong ki Tnad bapher bapher ka Sorkar Jylla”.
“Ngam lah ban ialam bakla ia ka Iing namar ka Sorkar ka dang ioh tang mar shiteng ka jingtip ia ka jingdon ki kam ba lait thylli” ong u Conrad haba pyntip ba ha Jylla ki don haduh palat 63 tylli ki Directorate, palat 60 tylli ki Tnad, 12 tylli ki Ophis jong ki Deputy Commissioner, 6 stylli ki Sub Division Office, 49 tylli ki Block bad ki Meghalaya House ha Guwahati, Kolkata, Delhi, Mumbai bad kiwei.
“Ngi don palat 200 tylli ki Ophis bapher bapher bad wat ha ki District, ki don ki Ophis jong baroh ki Tnad..Namar kata, ka kam ban lum ia ki jingkhein ka long kaba eh bha hynrei ngi la iaid shaid shaid ban lum ia ki jingtip” ula ong.
Namar ka jingbym hun ia ka jubab u CM, u MLA ka Rangsakona ula ong ba um tip satia balei ba u Myntri Rangbah u pyrshang ban kren kyllain namar u dei uba lah ban ai ia ki jingtip ia ka jingdon ki kam ba lait thylli kat haduh ka 31 tarik Lber 2022.
U MLA ka Nongthymmai Bah Charles Pyngrope ula ong ba u mynjur ia ka jingkren u Myntri Rangbah ba bun ki kam ki lah man ka sngi hynrei katto katne ki jingtip kila dei ban don bad ka Sorkar lehse lah ban dei haduh une u snem lane ha kano kano ka por.
U MLA ka Umroi ula pynbor ia u Myntri Rangbah ka Jylla ban ai ia ka jingtip tad haduh ka 31 tarik Lber 2021.
Haba jubab, u Myntri Rangbah ula ong ba ka Sorkar ka dei pynbeit thymmai ia ki Tnad baroh bad ka jingpyntreikam da ki kor computer ka dang iaid shaid shaid ban buh jingthoh ia kiei kiei baroh.
Ula pyntip ba ki don palat 3000 tylli ki jingpynbna laitkam kiba dang iaid mynta ha ki recruitment board ne ki shnat ba pyniaid ia ka jingthungkam thungkam.
