Shillong, Naiwieng 16: 22 tylli ki wiket ki la hap ha ka sngi kaba sdang jong ka jingiakhun hapdeng ka Meghalaya pyrshah ia ka Sikkim ha ka lympung ialehkai U-19 Cooch Behar Trophy 2025-26, kaba la sdang naduh mynta ka sngi ha madan ialehkai cricket jong ka MCA, ha Polo.
Ka jingiahun ka long ba ka Meghalaya hadien ba ka la lah ba kan jop ia ka jingkynting pisa, ka la ailad shwa ia ka Sikkim ba kan wan ba kan tied nyngkong, ha kaba ka la lah ba kan pynhap lut noh pat ki wiket ki jong ka hadien ba la kamai tang 76 ron, hadien kane, ka Meghalaya kaba la wan ban sdang ban tied ia la ka pali kaba nyngkong, ka la lah ba kan kamai 108 ron, kaba pynlong pat ia ka Sikkim, ba sa shisien kan khreh ba kan wan pat ban sdang ban tied ia la ka pali kaba ar ka jong ka, hadien ba ka la lah ba kan kamai 46 ron bad hap noh 2 wiket bad ban tam kylla da 14 ron ia ka Meghalaya.
Ka sngi ba sdang jong kane ka jingiakhun, ka long kaba ithiang bad ba shat phyrnai bha ki kjat sngi, kaba beit beit kaba kren shai kdar ba kan dei kaba paka bha na ka bynta ban bet, hynrei kaba la iarap lang ruh wat ia ki nong kawang bol ba kin lah ban ioh eiei lem na kane ka madan khamtam lei lei na ki spinners.
Ha kum kane ka jingiakhun, ba ka nam bad ka kyrteng jong ka sur ialehkai bha ka wan ba kan mih paw na u Mewankitbok Kharpuri uba shipor u la don bynta ruh bad ka lympung iakhun ka Vinoo Mankad Trophy (one day tournament), kaba hadien kane, ban jam pat sa sha kane kawei pat ka kyrdan iakhun ba kham heh (first class), ha kaba u la lah shisha ban pynpaw ne ban pyni ia ka sap bad ka jingtbit ka jong u ban lam khmat ia ka kynhun ki nongkawang bol ka Meghalaya ban khur 5 wiket naka bynta 17 ron na ki 10.1 over, bad la bynrap lang sa na ki spinner kum ki jong u Gaurav Narleng 2 wiket naka bynta 18 ron na ki 6 over, Apandanka R Marak 2 wiket, naka bynta 21 ron na ki 9 over bad u Paisal Ali u la ioh ban khur lem shi wiket.
Hynrei haba wan ban sdang ia la ka jong ka pali ban wan tied (batting) shu san kynsan, ka Meghalaya ka la lap ba hap ki wiket ki jong ka, ha shwa ba kiei kiei baroh kin lam sha kaba kham sniew, u Rudra Singh Rathor (24 na ki 44 bol) bad u Gaurav (22 na ki 28 bol), ki la seng ia ka nongrim kamai ron naka bynta ka wiket kaba lai kaba long 37 ron.
Ha ka khyllipmat kaba kine ki arngut I kumba ki la skhem bha ka rukom ialehkai ka jong ki hapdeng jong ka madan, ka Sikkim ka la sdang ba kan ailad ia u Parvin (3/26 na ki 11) bad Bhavya (5/17 na ki 3.2), ka wanrah ia ka jingkhyllem ki wiket ba dang sah ka Meghalaya.
Hangne pat u Mewankitbok u la wan ban pyllait im ia la ka kynhun hadien ba u la lah ban kamai 34 ron na ki 32 tylli ki bol, kaba la shu biang ia ka Meghalaya ba kan tam palat ia ka spah ron ka jong ka.
