Shillong, Nailur 15: U Myntri Rangbah ka Jylla Conrad Kongkal Sangma hynne ka sngi palei ula phong da ka sopti ba suh da ka jain Ryndia sha Iingdorbar Thaw Ain bad pynpaw ha ka Iing “Nga sngew sarong ia kane ka sopti ba shna hi da ki nongthain jain lajong”.
“Nga kmen shibun ban iathuh ia phi ba kane ka sopti ba nga phong mynta ka dei kaba suh na ka jain Ryndia. Kane ka rong (jyrngam) ka dei kaba la wiehrong hi bad ym tang katta, la pynwan dur bad suh hi da ki nongsuhjain lajong. Kane ka dei ka sopti bala suh pura ha Meghalaya bad kane ka dei ka kynja mar ba ngi la pynshlur mynta ban pynmih” ong u Conrad haba jubab ia ka mat iatai ba lyngkot halor ka jingkiew dor ki mar ki mata.
U Conrad ula ong “Ki briew kila kylli balei ba nga phong ia kane ka sopti mynta ka sngi. Nga la ong ba nga sngew sarong ia ka namar la shna ia ka da ki nongthain jain lajong. Ia kane la thain da ka Self Help Group ki Kynthei bad la pynwandur da ki nongpynwandur ia ki jain” ula ong.
