MWSL | Lashai yn iaknieh nam lahduh ka Jakrem SC bad Na Rympei FA

Shillong, Naiwieng 11: Ka rynsan ka long kaba la pynkhreh na ka bynta ka jingiaknieh ia ka nam lahduh jong ka lympung Meghalaya Women’s State League 2025, ka Meghalaya Football Association, ka ban long hapdeng ka Jakrem SC pyrshah ia ka Na Rympei Football Academy.

Ka phainal jong kane ka jingiakhun la buh ba kan long lashai ka sngi ha ka por 4 baje janmiet, ha SSA Stadium, First Ground, Polo.

Ha kane ka snem ba la sang nyngkong, la don kumba 20 tylli ki kynhun kiba la wan ban iashim bynta, ha kaba ia ka pyrda kane ka lympung la plie ia ka ha ka 20 tarik u Nailur mynta ka snem, bad haba khein kyllum tad shi sngi shwa jong ka phainal, la lah ban pynlong haduh 33 tylli ki jingialehkai.

Kaba ktik bad pynshon jingmut bha ia ki nongkit kam ka MFA ka long ba dei lyngba kane ka lymnpung ba kan plie lad ia ka kynhun ki thei ialehkai phutbol ka jylla ba kin lah ruh wat ban poi iashim bynta sha ka lympung ka Indian Women’s League.

Kumba ka long ia mynta, kum ka jylla ka dap da ka jingsngew sarong, ba lai ngut ki samla ialehkai ba kynthup ia ka Bonifilia Shullai, Alisha Lyngdoh bad ka Ribansi Jamu ki la ioh ban da mihkhmat ia ka ri ha ka kyrdan iakhun ka U-17 bad ka U-20, kiba la bteng ban da jam artad lang shakhmat kum ka kynhun sha ka lympung jong ka Asian Football Confederation.

Haba phai biang sha ka phainal kaba labuh ban long lashai ka sngi, na ka liang ka kynhun ki thei ialehkai ka Jakrem bad ka Na Rympei FA, jia ryngkhat ba kim dei  ki team ne kynhun ialehkai kiba ka thymmei ka jong ki kan dei nangne na ka nongbah, pynban ka kynhun ialehkai ka Jakrem ka wan mih khmat lyngba ka Mawkyrwat District Sports Association, katba ka kynhun ialehkai ka Na Rympei FA, ka wan ba kan mihkhmat na Ri-Bhoi District Sports Association bad ba la khmih lynti ba kane ka jingiakhun hi kan long kaba shongshit, iakhaid bad itynnad bha.