Gangtok, Naiwieng 9: U Myntri Rangbah ka jylla Sikkim u Prem Singh Tamang ula pynbna paidbah ba ki khynah kynthei kiba hapoh 14 snem ka rta jong ka jylla kin ioh ia ka jingai dawai ei na ka bynta ka cervical cancer naduh u bnai Iaiong jong u snem 2026.
U Tamang u la ïathuh ruh ba ïa ki kynthei kiba don ha ka rta kaba 30 haduh 65 snem ka rta yn ai ruh ïa ki tiar test cervical cancer khlem jingsiew naduh ujuh u bnai na ka bynta ban lap kloi bad ban sumar ïa kane ka jingpang.
Shuh shuh u la ong ba ki khynnah hapoh ka 14 snem ka rta la jied ban ioh ia ka jingai dawai ei namar ba ha kane ka rta ka treikam bha ha kata ka rta.
“Ha u snem 2026, ngin ai ïa kine ki jingai tika ïa ki khynnah ha baroh ki hospital jong ka jylla.Kane ka dei ka jingthmu kaba donkam bha kaba dei ka sienjam ba la shim da ka sorkar jylla, bad ngi kwah ba baroh kin ïashim bynta lang ha kane ka mission,” ong u Tamang.
Shuh shuh u la bynrap, “Haba ka pyrthei ka don ki lad jingïada ban lait na kum kane ki jingpang, ngi dei ban ïaid shakhmat da kum kine ki prokram na ka bynta ka jingmyntoi jong kito kiba lah ban lait na kane ka jingpang kaba shyrkhei.”
Kane ka jingpang Cervical cancer, kawei na ki jait jingpang kaba lah ban iada, kaba la pyniap kumba 300,000 ngut ki kynthei man la u snem, ha kaba palat 90 percent na ki jingiap ki jia ha ki ri kiba duna ha ka ioh ka kot.
