Shillong, Nailur 15: Ka Khasi Hills Autonomous District Council (KHADC) hynne ka sngi palei, kala shim ia ka rai ban ieng pyrshah jur ia ka jingthmu jong ka Sorkar Jylla ban buh ia ka ktem khalai Casino ha ki shnong khappud ka Ri-Bhoi District kat kum ka Meghalaya Regulation of Gaming Act, 2021.
Ka KHADC kala shim ia kane ka rai ha ka jingialang bala pynlong da u Chief Executive Member (CEM) Bah Titosstarwell Chyne bad ki MDC jong ka Council.
“Ka jingialang da kawei ka sur, kala rai ban pyrshah jur ia ka jingthmu ban buh ia ka ktem khalai casino hapoh Ri-Bhoi District” ong u Bah Titosstarwell haba iakren bad ki nongthoh khubor.
Kat kum ka jingong jong u, ka jingwan ia ka ktem khalai casino kan wanrah nam ia ka Jylla da kumwei pat kumba la pynsngew lem da ki Nongialam Niam, ki Khlieh Nongsynshar, ki Sengbhalang bad ki riew paidbah.
“Mynshwa ki ong ba ka Meghalaya kadei ka ri kaba tip briew tipblei, kaba don akor kaba don ia ki jaka kiba itynnad. Ngi dang kwah ba ki nongjngohkai haba ki wan shane kin sngewtynnad iaka jingitynnad ka mei mariang. Ngim kwah ba ki nongjgohkai kin wan shane ban ia khalai, leh kam awria ban wanrah iaki jingsniew kiba laiphew jait, ban wanrah iaka jingjyllei u drok bad kumta ter ter” ong Bah Titosstar.
Haba pyntip ba ka Council kala pan jingshai na u Syiem ka Raid Marwet halor ka jingkynnoh ai NoC ban buh casino, u CEM ula ong “Ngi la phah da ka shithi sha u Syiem ha ka 1 tariki Nailur bad ngi la ioh ia ka jubab ba u Suiem ula kyntait ba ula ai NoC”.
Haba kylli, u CEM ula pyntip ba u Syiem ka Raid Marwet ula pyntip ba ula iohi ha ki kot khubor ia ka jingpyrshah jong ki paidbah hynrei u ong “ki nongshongshnong ka Raid Marwet kim pyrshah satia ban buh ia kane ka ktem khalai”
“Kane ka mut ba u Syiem watla um pat ai NoC hynrei um pyrshah satia ia ka Casino. Ngi hap ban tihbniah namar ngi sngewthuh baka don kaei re kaei sha lyndet bad ngin hap ban pan jingpynshai shuh shuh na u Syiem” ong u CEM.
U CEM ula ong ba u Syiem ka Raid Marwet bad u Rangbah Shnong ki dei kiba don ka bor ban ai NoC haba bynrap “Lada u Syiem ula kyntait ba ai NoC, ka Council kan sa pan jingpynshai sa na u Rangbah Shnong”.
Une u Khliehduh ka KHADC ula pyntip ba ki don katto katne ki Rangbah Shnong ha Raid Marwet bad kumjuh ruh ki Sengbhalang kiba la dawa ban weng noh ia u Syiem ka Raid haba pyntip “Kila don bun ki jingujor pyrshah ia u Syiem bad ka Executive Committee ka dang bishar bniah bad kan sa shim ia ka rai”.
