Shillong, Naiwieng 05: Ka Rympei Football Academy, Pay For Right Football Academy bad ka Jakrem, ki long ki lai tylli ki kynhun kiba la buh jaka ialade sha ka kyrdan iakhun ka semifinal ka lympung ialehkai Meghalaya Women’s State League 2025, kaba la wan hadien ba ki la lah ban khur ia la ki nam jop ki jong ki, ha ki jingiakhun ki quarterfinal kiba la long mynta ka sngi ha madan ka SSA Stadium, Polo.
Katba sa kawei pat ka kynhun kaba la lah ban buh jaka ialade sha kane ka kyrdan iakhun ka dei ka kynhun ialehkai ka Laitkor SC, kaba la wan hadien ba ka la lah ba kan pynliem noh ia ki thei ialehkai jong ka Mawten SC da 10-1 ha ka jingiakhun kaba la long hynnin ka sngi.
Haba phai sha ki jingiakhun kiba la long mynta ka sngi, ka kynhun ka Na Rympei (Ri-Bhoi DSA) ka la pynliem da 8-1 ia ka Bright Future SSCC (Pyndengumiong DSA), katba ka kynhun ialehkai ka Jakren (Mawkyrwat DSA) ka la pynliem da 4-1 ia ka Diengshynrum SC (East Jaintia Hills District Football Association).
Pynban ka jingiakhun kaba itynnad bad kaba iakhaid bha ka dei ka nam jop kaba long da 3-2 da ka kynhun ialehkai jong ka PFR (SSA) pyrshah ia ka Mawlum Tyrsad SC (Tyrsad Area SA).
Ia ki kol ka Na Rympei SC, la thep ia ki da Pynhun Shulet (3′, 28′, 46′, 50′, 72′, 90’+2), Streamlet Taro (9′) bad Tracy Rympei (78′), katba ka shi kol ka Bright Future la thep ia ka da ka Blessiful Thongni (68′).
Katba ki kol lyngba ka Sunalinda Iawren (4′) Iaphisha Marbaniang (12′), Bahunlang Synrem (32′) bad Catherine Kharkongor (83′), ka pynlong ia ka Jakrem ba kan ioh ban thep ia ki saw kol ki jong ka, bad ka shi kol , katba ia ka shi kol ka Deinchynrum la thep ia ka da ka Charlinda Nongtdu (72).
Ka jingiakhun ia ki semifinal kane ka lympung la buh ban long ha kane ka sngi Saitjain jong ka taiew ha ki artylli ki madan, katta ha SAI STC NEHU bad SSA Stadium, Polo ha ka por 10 baje mynstep.
