Col CK Nayudu Trophy | Ïakhun dohiap ka Meghalaya haduh da ïakhaid bad ka Goa

Shillong, Naiwieng 05: Ka kynhun ki samla ialehkai kriket ka jylla ki la iakhun dohiap bad tyngeh bha tad haduh ba kin da lah syndon ba kin tan sha ka jingiakhaid (draw) pyrshah bad ka Goa, ha ka lympung ialehkai jong ka U-23 men’s Col CK Nayudu Trophy Elite Group, kaba la poi noh artad sha kaba kut hynne ka sngi ha madan ialehkai cricket ka MCA ha madan Polo.

Kane ka jingiakhun kaba da dohiap bha ki rang ka jylla, ka long hadien ba ki la lah ban tied (bet) jan baroh shi sngi, kaba la khanglad ia ka Goa ba kan leit phai na kane ka jaka ryngkat bad ka jingjop.

Haduh kaba kut jong ka jingialehkai jong ka sngi u Manish Sharma u la lah ban kamai 80 ron ba la wan na ki 177 tylli ki bol ryngkat bad u Sudhir Sahani uba la phai khmat ban ialehkai 28 tylli ki bol khlew kamai pat wat tang shi ron ruh, kaba pynlong ia ka Meghalaya ba kan lah ba kan kamai 194 ron hadien ba jka la hap noh 7 wiket.

Kumban shu pyunkynmaw ba ha ka pali wan tied ba nyngkong, ka Goa ka la lah ba kan kamai haduh 372 ron hadien ba ka la hap baroh ki wiket ki jong ka.

Ka Meghalaya kaba la wan ba kan sdang ia la ka pali  wan tied (bet) kaba ar ka jong ka na ka 18 ron, ka la lap ba hap noh wiket jong u  Avinash Rai (8) ia kaba la bynrap sa ka jinghap ka wiket u Dipankar Baruah (2), Sachin Kumar (31), Kevin Christopher (32).

Katba kitei ki wiket ki la iai bteng ban hap uwei hadien u uwei, u Manish, u la long u shot shan bah ia ka kynhun ha kaba u iai  pynpaw ia ka mynsiem iakhun kaba dohiap bha ka jong u ba da kumno ban lah ban pyllait im ia la ka kynhun ban mad ia ka namrem ka jong ka na kane ka jingiakhun, da kaba u iai seng ia ka nongrim kamai ron ka kynhun da ka jingiakyrshan lang kiwei pat ki paralok ba ialehkai, kaba hangne, wan mih ka jinglah ban ia kamai ron paralok ba 65 ron bad u Kevin na ka bynta ka wiket kaba san, hadien kane ban seng biang sa kawei pat u Shavian Blah, kaba la iarap bha ia ka kynhun ba kan lah ba kan iakhaid na kane ka jingiakhun.

Kumba ka long ia mynta kane ka lympung kan jam shwa sha ka jingiashong thait kaba shipor, ha kaba kan sa sdang biang haduh u bnai Kyllalyngkot jong u snem ban sa wan, hynrei kane ka juh pat ka  kynhun ialehkai ka jylla kan bunkam ba kan pynkhreh pat ba kan mihkhmat sha ka lympung ialehkai jong ka BCCI State A Trophy 2025-26, ha kaba ka jingiakhun ba nyngkong ia ka Meghalaya kan long pyrshah ia ka Sikkim ha ka 9 tarik mynta u bnai kaban long ha Punjab.