Guwahati, Naiwieng 5: Ki Pulit jong ka Nagaon kila ioh ban pynpra ia kawei ka ktem khaii khyllai briew ha ka shnong Hooj Kaibarta, kaba la ialam pat ban kem ia lai ngut ki briew ha ka sngi Ba-ar.
KIne ki briew kiba la shah kem la tip kyrteng kum u Deep Das, u Dharoni Das aba ju khot sin kum u Bogamula, bad u Mahendra Das.
U Senior Superintendent of Police (SSP) ka Nagaon u Swapnanil Deka u la ong ba kane ka jingkhynra la pynlong ha kine ki khyndiat sngi kiba la dep bad la ioh ban pynpaw pyrthei ia kane ka network ne ka kynhun ba khaii ia ki shi bynta jong ka met briew bad la ioh jingtip ba kane kala trei kam bha la katto katne snem.
“Kane ka kam ka la paw pyrthei nyngkong eh ha u snem 2021 ha kaba hynriew ne hynniew ngut ki nongshong shnong kila die sop ïa ki khyllai jong ki lyngba ki dalal.Kane ka mat ne ka kam shi por kala jah noh hadien ka jingsngewkhia bad tuklar noh da ki paidbah nong shong shnong, hynrei mynta la ïathuh ba ka la mih biang ha kine ki bnai ba la dep.Kito kiba pyrshang ban pynsangeh ia kane ka jingleh beain ki shah byrngem byrsit,” ong ka tyllong khubor.
Ki paidbah nongshong shnong ki la kynnoh ba bun ki nongshong shnong ki la shah pynngop ha ki jingkular ban ioh pisa ha ryngkat bad ka jingim kaba bha ia ki. La kynnoh ba ki dalal ki pynap shrip ia ki briew kiba don jingeh ha ka pisa ne ha ka ioh ka kot bad kila pynbiang ia ki nongthied lyngba ki jaka sumar bym pat pynshisha shabar jong ka district.
Katkum ki report ki pyni ba kiba bun na ki nong shong shnong kila dep ban die ia la u jong u khyllai jong ki.
Katkum ka jingpule ne wad jingtip la lap ba ka jingduk kadei kawei ka daw bah kaba la pynlong ba ki hap ban die noh ia la ki jong ki khyllai.Ka jingeh ha ka ioh ka kot bad ka jingkwah ban lait na ka jingduk kaba la pynlong ia ki ban leh ia kane ka kam.
“Ha ka pyrthei, ka jingdawa ïa u khyllai ka la palat ban ïa ka jingpynbiang na ki nongai kiba dang im bad kiba la khlad noh. Ka jingdawa ka jur haba ïanujor bad ka jingdon kaba la pynlong ïa u khyllai kum kawei na ki dkhot met jong u briew uba lah ban die bha,” la kdew ka jingwad bniah ba la pynmih da ka Global Public Health journal.
