Khang tala ka NEHUSU bad KSU ia ka Ophis u VC ba khot jingialang ha Delhi

Shillong, Naiwieng 5: Kum ka dak jong ka jingpyrshah, ki dkhot jong ka North-Eastern Hill University Students’ Union (NEHUSU) bad ka Khasi Students’ Union-NEHU Unit (KSU-NEHU Unit) kila khang tala ia ka ophis treikam jong u Vice Chancellor ka NEHU hynne ka sngi Baar, ban pyrshah jur ia ka jingthmu ban pynlong ia ka jingialang Executive Committee ba 193 ha New Delhi.

Ha ka shithi kaba la phah sha u Pro-VC ka NEHU u Prof Sumarbin Umdor, ki samla pule kila ong ba katei ka jingthmu ban pynlong ia ka jingialang jong ka EC ka pynkhein ia ki jingbthah jong ka Ministry of Education ban pynlong ia ka jingialang hapoh jongka Campus jong ka skulbah.

Ki Union kila pynbna ban pynlong da ka jingiakhih ka bym ai iaka jingiatreilang ne ka Non-Cooperation Movement pyrshah ia u Vice-Chancellor Prof PS Shukla, da kaba pynpaw ba ula shu jah klep, kyntait ia ka bha ka miat jong ki samla pule bad ka jingpulom ha kaban pynthikna ba kan don ka jingtreikam kaba long katkum ka synshar paidbah.

Kila kam ba u Vice-Chancellor ula pep na ka skulbah la 354 sngi, kaba la pynthud ia ka rukom treikam bad pynslem ruh ia ki rai ha kaba iadei bad ka pule puthi.

Ki samla pule kila kdew ruh ba ka skulbah NEHU kala mad ia ka jingkyrduh pisa da ka jingpynduna ia ka bhah ban siew ia ka tulop bad kala buh ia ka jingkylli halor ka jingbhah ia ka tyngka na ka bynta ban pynlong ia kaj ingialang ka EC ha

New Delhi. Kila pynpaw ba katei ka jingialang kadei ka jingthmu ban iaid palat ia ka jingai ia ka jingkhein jingdiah bad ban nym kynthup ia ki nongmihkhmat ia ki samla pule.

Ki Union kila pynpaw ruh ba kano kano ka rai ne ka Rsolution ym dei ban ai jingithuh ne ban pdiang da ki samla pule bad kala dawa ba ia ka jingialang jong ka EC dei ban pynlong hapoh ka kyrpong jong ka skulbah da kaba jingkhuid jingsuba, ka jingai ia ka jingkhein jingdiah bad ka jingioh iashimbynta da baroh kiba iadonbynta lang.