Shillong, Risaw 30: Ka Hynniewtrep National Youth Front (HNYF) kala phah da ka jingthoh sha u Myntri ba khmih ia ka Revenue and Disaster Management u Bah Lahkmen Rymbui, ban pan jingpynshai halor ki jingkynnoh ba kala don ka jingleh buittuh halor ka rukom aiti ia ki jaka sorkar.
Ha ka shithi kaba la phah sha u Bah Rymbui ha ka sngi Palei, ka HNYF kala kam ba katto katne ki politishan bad ki ophisar sorkar kila leh buittuh ha kaban ai ia ki jaka sorkar sha ki kynhun shimet ne jaka pule kynthup ia ki heh saipan bad ia ki politishan kaba long ka jingpynkhein ia ka Government’s Office Memorandum kaba la pynmih ha ka 24 tarik u Jylliew 1998.
Ka HNYF kala kdew ba ka jingai ia ka jaka ka sorkar ha ka thain Polo, naduh Polo Orchid shaduh Saw Furlong bad palat bad kumjuh ruh hapoh Rilbong, ha kaba ia ka jaka la aiti sha ki bym dei ki riewlum ha ka kyrteng jongka Trust. Ka seng kala kam ba kane ka rukom ai jaka kadei ka jingpynkhein ia ki hukum kiba la pynmih da ka iingbishar bad kala pynduh ia ka lad ia ki trai shnong ban ioh jaka ban sah.
“Ka jingai ia ki jaka sorkar kaba la sdang naduh na Polo Orchid shaduh Saw Furlong bad palat. Ka sorkar kala ai ruh ia ka jaka sorkar ha Rilbong sha ki bym dei ki riewlum ha ka kyrteng jong ka Trust. Katei ka jaka kaba la kdew haneng kaba la ker bha, kadei kaba la longtrai da ka sorkar ia kaba ki kot ki sla kadei kaba la pynskhem da ka rai jong ka iingbishar. Kiba shem jynjar kila mad jingeh ban ioh ia ka jak sah, katba ka sorkar kala ai sngewbha sha ki politishan, ki heh ophisar bad ki heh saipan ha ka khaii pateng” la pynpaw ka HNYF ha ka shithi.
“Kumta ka HNYF ka kwah ba ka sorkar kadei ban pynduh noh ia kano kano ka jingai jaka khamtam eh ia ka jingai iaka jaka sorkar ha ka thain Polo” kala dawa.
Ka seng kala kyntu ruh ia ka sorkar ba kadei ban shimkhia ban iada ia ki jaka jong ka sorkar.
