Shillong, Risaw 31 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ula pynthikna ba ka Sorkar kala shim ia ki sienjam kiba donkam ban tehlakam ia ka jingpyn jaboh ia ka Wah Umngot.
Haba shimkhia ia ka jingsngewkhia halor ka jingkylla jngut ka wah namar ka jingpyntuid khyndew na ka jingshna ia ka surok Shillong-Dawki, u Bah Prestone ula pyntip ba la dep bthah ia ka kompani ba pyntrei ia ka kam ba kan shim ia ki lad ki lynti ban khang ia ka jingtuid ka khyndew bad ki jaboh jabain sha kane ka wah.
Haba kubur ia ka jingeh ban tehlakam pura ia ka jingtuid ka khyndew sha kane ka wah, khamtam ha ka por ba tih bad dang pyntrei, u Symbud Myntri Rangbah ula ban jur ba la dep bthah shai ia ka kompani ba kan sangeh ka jingtheh iaka khyndew shajan ki nala/wahduid kiba tuid sha ka wah Umngot.
“Ngi la dep bthah ia ka komkani ban sangeh ka jingpyntuid khyndew. Ha kajuh ka por, naba ki wahduid mynta ki por ki tuid um, wat lada hap khyndew tang khyndiat ruh, ka um kan rong beit ia ka. Ka don ka jingeh ha kane. Hynrei ngi la ai ia ka jingbthah kaba shai ba ka kompani ka dei ban pyrshang ban tem bad khang ia ka khyndew ba kan ioh lynti ban poi sha ka wah khnang ba kan nym jaboh” ula ong haba iakren bad ki nongthoh khubor.
Ka Wah Umngot, kaba la bna nam kum ka wah ba khuid tam ha dewbah Asia kala kylla jngut bad um ktieh, kaba la ktah jur ia ki nongshongshnong ka thain kiba im jakpoh na ka jingwan kai ki nongjngoh pyrthei.
 Bah Prestone Tynsong ula pynthikna ba ka Sorkar kala shim ia ki sienjam kiba donkam ban tehlakam ia ka jingpyn jaboh ia ka Wah Umngot.){kind=link}