Shillong, Risaw 27: Ka sorkar jylla kala pynkhreh ban pyntreikam noh ia ka rukom siew tulop bala pynbeit ryntih ia ki nonghikai hapoh ka jylla hapoh u bnai Nohprah mynta u snem, pynbna da u Myntri ka pule puthi u Bah Lahkmen Rymbui haka sngi Nyngkong.
Haba jubab ia ka jingkylli halor ka jingthmu shimti noh ia ki 3,332 tylli ki skul SSA, kiba la dep aiti ia ka No Objection Certificate (NOC) ban pyniaid ka sorkar jylla, u Bah Rymbui ula ong, ba ka sorkar kala sdang ia ka jingiasyllok bad ki kynhun ba donbynta lang ha ka kam kynthup ia ki nongmihkhmat ki nongtrei SSA kiba la dawa ban ai noh da ka jingsiew kaba ryntih bad ia ka kam kaba shngain.
Ula ong ba u Myntri Rangbah ula pdiang ia ka jingdawa ban ai iaka jingsiew kaba ryntih bad ka sorkar ka dang pynwandur ban pyntreikam ia katei ka bynta.
“U Myntri Rangbah ula pdiang ba ka sorkar kan sa pynmih ia ka rukom siew kaba ryntih hapoh u bnai Nohprah 2025” ong u Bah Rymbui.
U Myntri ula bynrap shuh shuh da kaba ong, “Shisien ba ngi la lah ban pyndep ia kane ka mat, sa kiwei kiwei ki mat kin iaid lang shakhmat, kumta ka tnad ka dang trei ia ka kam ban pynwandur hynrei ia mynta hi, ngin ia peit shwa kaei kaba ka sorkar kan leh ha ka jingiasyllok bad kiba donbynta lang ha ka kam hapoh jong kine ki 2 bnai”.
Ula banjur ba ka sorkar ka donkam ban pynneh pynman kumjuh ia ka jingdonkam ia ki jingdon jingem ban kyntiew iaki bynta jong ka imlang sahlang kaba kynthup iaka pule puthi, khlem da leh klet pat ia kiwei kiwei ki bynta ruh jong ka imlang sahlang.
“Ha baroh kiei kiei, kan don ka jingktah ia ka jingpynlut pynsep, kumta ngi hap ban peit kaei kata kaba ka sorkar kan lah ban leh, namar haba nga ong kumtei, ngi donkam ban kyntiew ia baroh ki bynta kiba iadei bad ka imlang sahlang. Haba don ka jingsiew kaba ryntih, kam mut pat ba kiwei pat ki bynta kin mad jingeh noh. Ngi hap ban don ka jingryntih lang ia kiei kiei baroh. Ia mynta hi, ka dang lonmg kloi palat ban ong eiei” ula ong bad ka bynrap “Ngi hap ban iasyllok bad baroh kiba donbynta lang ha ka kam bad kano kano ka jinglut jingsep kaba don, ngin sa pyntip namar ba ka sorkar kam dei tang ia ngi, ka sorkar kadei na ka bynta ki paidbah kumta ngi hap ban peit ba kan don ka jingbit jingbiang lang ha baroh ki liang”.
“Kawei kaba nga sngewkmen ka long ba ha man la ki jingialang bad ki kynhun, baroh kila wan da ka jingmut jingpyrkhat kaba iar. Ki tip ba ki don ki jingeh, ki tip ba ki don ki jingtynjuh hynrei kila wan pat da ka jingmut jingpyrkhat kaba iar. To ngin ia khmih lynti ba ka sorkar ruh kan iaid shakhmat da ka jingmut jingpyrkhat kaba iar khnang ban gin lah ban pynkylla ia ka rukom pyrkhat ka jong ngi baroh lang ban iohi ba kitei ki mat kaba ngi mad jingeh man la ka snem, ngin lah noh ban pynbeit noh kham kloi” ula bynrap shuh shuh.
Haba kylli la kane ka sienjam ka dei shi bynta jong ka jingtyrwa ka sorkar ban pyntreikam ia ka Meghalaya Education Grant (MEG), u Bah Rymbui ula ong ba kane ka sienjam kadei shi bynta jong ka jingpyrshang ka sorkar ban wanrah ia ka jingkylla ha kaba iadei bad ka pule puthi, ia kaba u Myntri Rangbah ula smai ha u snem 2018.
Ka sorkar ka thmu ban pynbeit ryntih noh ia ka tnad pule puthi ha kaba yn don beit noh tang ar jait ki skul kata ki skul sorkar bad ki skul kiba ioh jingiarao na ka sorkar nalor ki skul kiba la pyniaid da ki riewshimet.
U Myntri ula pynpaw ia ka jingkyrmen ba ka sorkar bad kiba donbynta lang ha ka kam kin lah ban iatreilang ha kaban pynbeit ia ki mat kiba mad ha ka liang ka pule puthi bad kitei ki jingthmu ban wanrah ia ki jingkylla kadei da ka jingthmu ban shimkhia ia ki mat kiba la dep ban ithuh ha ka liang ka pule puthi ha kine ki 5 ne 7 snem.
