Nongstoin, Risaw 27: Ka New Nongstoin Sports Club bad Dilingim Sport Club, ki la ioh rah ia ka nam kum ki lahduh ha ka lympung 1st MLA Cup Football Tournament kaba la long ha madan New Nongstoin.
Kane ka lympung kaba nyngkong eh ba la pyniaid da ka MLA Cup Football Tournament Committee, ka dei kaba la pynlong naduh kine ki taiew kiba la dep ha kaba ki kynhun bapher bapher ki la iashimbynta.
Hynne ka 27 tarik u Risaw 2025, la pynkut noh lyngba ki jingialehkai phainal ha kaba na ka liang ki kynthei kiba ialehkai ha ka madan Futsal, ka Dilingim ka la pynliem ia ka Mawkhlam da shi kol la nod. Katba na ka liang ki shynrang ka New Nongstoin ka la pynliem ia ka Mawkaton da ar kol la nod.
U kongsan u ba la donlang ha kane ka lympung dei u Bah Prestoen Tyngsong Deputy Chief Minister ha ryngkat u local MLA Bah Gabriel Wahlang, Bah Gigur Myrtong, Bah N.Nongdkhar, Bah H.M Shangpliang bad kiwei kiwei de ki kynrem ki lyndan.
Hadien ba la kut ka jingialehkai phainal jong ki shynrang, la sam ia ki khusnam sha ki rang bad thei ialehkai kiba pawnam tam jong ka lympung. Kumjuh ruh la sam ia ki khusnam pisa ryngkat ki trophy sha ki kynhun lahduh bad kiba la wan ha ka kyrdan kaba ar.
Na ka liang ka Committee ka la pynbna ruh ban iai bteng ia kane ka lympung na uwei u snem sha uwei pat, kum shibynta bann kyntiew ia ka sap ka phong jong ki samla ha ka District baroh kawei.
