Shillong, Risaw 23 : Ka Khasi Hills Autonomous District Council (KHADC) kala mad ia ka jingslem ban ioh pdiang ia ka 2nd installment jong ka Tied bad Untied Grants u snem 2021-22, bad u Executive Member (EM) ka Tnad Development Bah Powell Sohkhlet ula pynpaw ba ka Council kam lah ban ai kano kano ka jingkular lano ba kan ioh pdiang ia ka pisa.
Haba jubab ia ka jingkylli bala wanrah da ka MDC ka NPP Kong Grace Mary Kharpuri ha ka sngi Palei, u Bah Powell ula batai ba ka Council kala trei shitom ban pyntreikam ia ki kyndon ka 15th Finance Commission kynthup ka jingpynrung ia ki scheme ha ka 2-portal, ban siew online, bad pyndei ia ka online auditing ia ki account jong u snem 2020-21.
Hynrei, ka Council kala mad ia bun ki jingeh bad ka portal, kaba la pynsuki ia ka kam.
Ka kong Grace kala pynpaw ia ka jingbym sngewtynnad bad jingbitar, da kaba ong ba ka jingslem kala buh ia kiba bun ki MDC ha ka jingeh bad kyrpad ia ka EC ba kan pynsted noh wut wut ia ki kam khnang ban pynthikna ia ka jingpyllait noh mardor ia ka 2nd installment.
Kala pynpaw ruh ia ka jingsngewkhia halor ka jingbym lah jong ka Council ban pyllait ia ka song pisa ba donkam bad ban siew ia ki bill jong ki kam bala dep pyntrei, haba buh jingkylli balei ba bthah ia ki contractor ba kin wan sha Shillong bunsien.
U Nongialam ka Liang Pyrshah Bah Titosstarwell Chyne ula buh jingkylli ia ki daw ha lyndet ka jingslem bad u Bah Powell ula jubab ba ka Council kan hap ban pyntreikam ia baroh ki kyndon treikam bala buh kat kum ki kyndon jong ka Finance Commission, kynthup ka online auditing, kaba dei ka jingeh kaba khraw ia ki Ophisar jong ka Council.
U Bah Titos ula pynpaw ruh ia ka jingsngewkhia halor ka jingkut noh jong ka 15th Finance Commission bad la ka Council kan dang ioh ne em ia ka 2nd installment jong ka Tied bad Untied grants.
“Kiba bun ki MDC kila kyntu ia ki nongioh skhim, kynthup ki Iingmane, ki skul, ba kin phah ia ki jingtyrwa da ka jingkular ba kin pynioh skhim, bad mynta namar kane, kala pyni ia ki MDC kum ki nongshukor”.
U Bah Powell ula jubab ba ki skhim hapoh ka 15th Finance Commission ki dei na ka bynta u snem 2021-2022 bad ka EC ba ialam ka VPP ka dang shimti ha u 2025 bad ka jingslem ka dei namar ba ka Council ka treikam offline ha ka jaka ban leh online.
 kala mad ia ka jingslem ban ioh pdiang ia ka 2nd installment jong ka Tied bad Untied Grants u snem 2021-22, bad u Executive Member (EM) ka Tnad Development Bah Powell Sohkhlet ula pynpaw ba ka Council kam lah ban ai kano kano ka jingkular lano ba kan ioh pdiang ia ka pisa.){kind=link}