Shillong, Risaw 17: U Myntri ba dei peit ia ka tnat Arts & Culture u Bah Sanbor Shullai u la ban jur ba ka jingpule kot ka dei ka spah bah namar ka ai ka lad ban pyniar ia ka rukom pyrkhat bad ban pynroi ia ka pule dangle.
“Dei lyngba ka jingpule kot ba ka jingnang jingstad ka nang kiew bad ka jingmut jingpyrkhat ka nang jylliew kumta ka pynkylla ïa ki jingim bad ïa ki paidbah hi baroh kawei. Ka jingmlien ban pule kot ka lah ban pynlong ïa ngi ban kham tip ïa ka kolshor, ka imlang sahlang, bad kiwei kiwei, da kaba pynlong ïa ngi ki briew kiba kham tip kham bha ïa kiei kiei baroh” ong u Bah Sanbor haba kren ha ka workshop ka tnat Directorate of Arts and Culture hapoh ka National Mission on Libraries Scheme halor ka phangpdeng ‘Habit of Reading as a tool for Social development and Economic upliftment’ ha U Soso Tham Auditorium.
Ka thong jong ka workshop kadei ban kyntiew ïa ka jingmyllen ban pule kot bad ban pyniar ia ka jingnang jingtip ïa ki khynnah skul, ki riewieid kot bad ki riewwad bniah bad ia ki riew paidbah ym tang ban sngewtynnad ha ka ban pule hynrei ban sngewthuh ïa ka jingkordor jong ki Library bad ka bynta ba ki don ha kaba pynïar ïa ka jingmut jingpyrkhat, ka jingpynroi ïa ka imlang sahlang.
U nong ai jingkren ha kane ka sngi u Prof Shalini Lihitkar, MLISC, NET, PhD, HOD Department of Library and Information Science, Rashtrasant Tukadoji Maharaj Nagpur University, Maharashtra ula ai jingtip halor ka bynta jong ka jingpule ha kaba pynjanai ïa ki nongshong shnong kiba la tip bha bad ka jingnoh synñiang jong ka sha ka roi ka par ha ka imlang sahlang bad ka jingkiew ha ka imlang sahlang.
Kiba wan ban ïashim bynta ha kane ka jingïalang ki kynthup ïa ki samla pule na ki 15 tylli ki skul, ki samla pule na North-Eastern Hill University, Martin Luther Christian University, ki dkhot jong ka Kali Kit Kot bad ka Seng Kynthei Laitumkhrah Pyllun, ki riew shemphang ha ka library bad ki nongpyndonkam ïa ka Library jong ka State Central Library.
