Nongstoiñ, Risaw 17: Uwei u rangbah ba tip kyrteng kum u Bah Balentin Lyngdoh Marshillong 53 snem ka ka rta na ka shnong Risiang, u la ngam jyllop hapoh ka Wah kaba don hap ka shnong Risiang.
Katei ka jingjia ka la jia ha ka por kumba 8 baje mynmiet jong ka sngi Palei bad ïa ka met jong utei u rangbah, la lah ban sei noh napoh katei ka Wah hadien kumba 2 kynta lyngba ka jingïarap ka kynhun ki pulit Fire and Emergency Service na Nongstoiñ.
Katkum ka jingïathuh u Sordar ka Shnong Risiang, u tei u rangbah hadien ba u la ïa shongkai bad ki para shnong, u la leit sha katei ka wah da ka jingthmu ban sait kti. Hynrei ha katei ka por u la kum hap harud wah bad la ong ba u la ngam kai noh ha um bad kam ruh sha shilliang ka wah, namar la ong ba ka um ka la kham jyndong ha kata ka jaka. Ki la don ruh ki khun jong u kiba ïohi bad ki la pyrshang ban leit tan ïa u hynrei u la ong ym lei lei un sum shwa.
Hadien katto katne por kynsan ki la shu ïohi ïa utei u rangbah ba u la ngam jyllop noh katba u dang ngam sha shilliang ka wah. Mar kumta hi ki khun jong u ki la leit ngam ha katei ka wah ban wad ïa u bad la ong ruh ba ha katei ka jaka ba u ngam, kam da dei kaba jylliew hynrei ki khlem lap satia bad ka la don ruh ka jingïapyrshang wad da ki paidbah nongshong shnong, pynban khlem ïoh ne lap satia bad dei tad hadien ynda la wan poi ki pulit ka tnad Fire and Emergency Service sa lah ban sei noh ïa ka met jong u napoh ka Wah.
