Shillong, Risaw 16 : U Myntri Rangbah ka Jylla Conrad K Sangma ula ai ka jingkular ba ka Sorkar kan ai jingiada ia ka jingshakri jong baroh ki nonghikai SSA ha ka Jylla.
Ia kane ka jingkular la ai ha ka jingialang ba long ha ka sngi Palei bad ki nongialam ka Meghalaya SSA Schools Association (MSSASA), All Meghalaya SSA School Teachers Association (AMSSASTA), bad ka All Meghalaya Fourth Teachers’ Association (AMFTA).
Ha kane ka jingialang la iashimbynta lang da u Myntri ka tnad Pule Puthi Lahkmen Rymbui, ki Heh Ophisar na ka tnad Pule Puthi, bad kala iakren halor ki artylli ki mat : ka jingshimti noh ia ki skul SSA ban iada ia ka kam jong ki nonghikai bad ka jingpynheh ia ka tulop ki nonghikai SSA.
“Ngi la ioh ia ka jingialang kaba sngewtynnad. Ngi ai khublei ia u Myntri Rangbah bad u Myntri ka tnad Pule Puthi ba kila kren shai ba ka Sorkar kan ai jingiada ia ka jingshakri jong baroh ki nonghikai SSA, haba khmih ba ka prokram SSA kan kut noh ha ka 31 tarik Lber 2026” ong u President ka MSSASA Bah Aristotle Rymbai.
Halor ka jingpynkiew ia ka tulop, u Bah Aristotle ula ong “U Myntri Rangbah ula kren shai ba ka jing pynkiew tulo ia ki nonghikai SSA kan long ha ka dur jong ka pay scale”.
Ia kiei kiei baroh bala iakren ha ka jingialang yn sa pyntip sha baroh ki nonghikai SSA ha ka general meeting ka ban long shen.
Ki seng ki nonghikai kila pdiang ia ka jingkular bala ai da u Myntri Rangbah bad u Myntri ka tnad Pule Puthi.
“Ia ka general meeting yn sa pynlong hadien ba ioh ia ka minutes jong ka jingialang” ong u Bah Aristotle.
