Kohima, Nailur 14 : Ka liang pyrshah Congress ha Nagaland kala pynpaw ka jingangnud ban thaw ia ka kynhun synrop jong ki party kiba kdup bad burom ia baroh ki jait niam (secular alliance) hashwa ka jingpynlong ia ka ilekshon Assembly ha kaba sdang jong une u snem 2023, ong u president ka party u K. Therie hynnin ka sngi ba Ar.
Ka Congress kaba la synshar ia ki jylla ka thain shatei lammihngi (Northeast) haduh jan 15 snem kynthih ha ka por ba ki kam lehnoh ki dang jur bha nalor kiwei pat ki jingeh, kala iakhun na ki 18 tylli ki seat napdeng ki 60 seat ha ka ilekshon Assembly ha u snem 2018 ha ryngkat bad kiwei pat ki party hynrei kila mad ia ka jingshah rem.
U Therie ula ong da kaba shim halor ka jinglong jingman ha ki kam sain hima hapoh ka ri, kumta ruh ka jingthaw ia ka kynhun synrop “secular alliance” bad kito ki party kiba paw na ka bynta ban pynrem ia ka BJP ka dei ka jingdonkam kaba kyrkieh.Hynrei, watla katta um shym la pynmih ia ki kyrteng jong ki party kiba ka party ka jong u kan thaw ia kane ka kynhun synrop.
Na ka liang une u heh ka party Congress ula kyntu ruh ia kito ki nongialam barim jong ka seng ki bym shym la ia don bynta shuh, ki nongtrei bad kiwei pat ba kin pyniasoh biang bad ka party na ka bynta ban iakhun ia ka kynhun pyrshah Blei, pyrshah Khristan, pyrshah Muslim bad kaba long pyrshah ia ki kynthei.
Ula ong ruh ban weng ia ki jingeh bad ban lah ban pynbeit ia ki kam sain hima sima jong ki jaidbynriew Naga, donkam ia ka sorkar kaba burom bad pdiang ia baroh ki jait niam bad kaba iaid ha ka lynti jong ka jingsynshar paidbah ha ka jylla Nagaland.
“Ka jingiabhah seat hapdeng ka party NDPP-BJP hynriew bnai shwa ka jingpynlong ia ka ilekshon Assembly ka dei ka jingpyrshang ban pynklet ia ka jingphaikhmat jong ki paidbah halor ki sienjam kiba thmu ban pynkut noh ia ki jingeh sain hima jong ki jaidbynriew Naga ia kiba la khylliap noh,” ong utei u nongialam Congress.
Shuh shuh ula ong ba ka Congress kan pynieng kumba 40 ngut ki kyrtong ha kane ka ilekshon Assembly, ia kaba la khmih lynti ban pynlong ha u bnai Rymphang jong u snem u ban wan.
Da kaba khot ia jan broh ki party sain hima ha ka jylla lait noh ka BJP kum ki party kiba burom bad pdiang ia baroh ki jait niam, utei u heh Congress ula ong ba ka sorkar synshar jong ka Nationalist Democratic Progressive Party (NDPP) ruh ka lah ban pyniasoh lang lada ki kwah ban pynneh ia kane ka jinglong ‘secular’ bad na ka bynta ka bha ka miat jong ka jylla.
Da ka jingdon jong 42 ngut ki nongthaw ain, ka NDPP kala ialam ia ka sorkar kaba duna ki lieng pyrshah ha ka sorkar Nagaland, ha kaba ka BJP lyngba ki 12 ngut ki dkhot kala kylla long ka paralok synrop kaba rit naduh ka snem 2018.
