Shillong, Risaw 15: U Myntri Rangbah ka Jylla Conrad K Sangma ha ka sngi Balang ula pyntip ba ka Sorkar kala kynshew bun bha ka pisa ha ka pule puthi da kaba ai pisa haduh T. 3,654 klur nalor ki grant-in-aid bad kiwei kiwei ki jingkyrshan.
Haba ai jingkren ha ka jingplie ia ka Nongkharai Presbyterian Higher Secondary School, Umsohpieng, u Myntri Rangbah ula iathuh ia ka jingkiew shaphrang jong ka Jylla ha kine ki hynriew snem shiteng bala leit noh haba pyntip ia ka jingpynleit jingmut ka Sorkar sha ka kam bhalang, ka jing pyntrei ia ki jingtei bad ka jingpynroi ia ki briew.
U Myntri Rangbah ula pyntip ruh ba ka Meghalaya mynta kala dei ka Jylla ba wan ba-ar ha ka jingkiew sted ka ioh ka kot hapoh ka Ri India hadien ka Tamil Nadu, ha kaba ka jingkiew jong ka, kala kot 10% man la u snem ha kine ki lai snem bala leit noh.
Ula kren halor ka jingpynkylla ba dang iaid shakhmat ha ka kam pule dangle, kynthup ka jingpynbeit ryntih ia ka tulop na ka bynta ki nonghikai Adhoc bad SSA, da ka jingthmu ban pynkhlain ia ka rukom treikam ha kine ki 10-20 snem ban wan bad ban pynthikna ia ka jingshakri kaba biang bha ha ka pule ka dangle.
Haba banjur ia ka roi ka par ki samla, u Myntri Rangbah ula pynshlur ia ki Kmie Kpa, ki Nonghikai, bad ka Imlang Sahlang ba kin btin lynti ia ki khun samla ba kin shim ia ka lynti kaba tei lyngba ki kam ialehkai, ka put ka tem, ka sengkam sengjam bad ki kam ba bha ha ka imlang sahlang.
Ula pynbna ruh ia ka jingnoh synniang na ka Chief Minister’s Special Grant Fund ban ai jingiarap thied tiar tem sha ki samla pule ka Sijun Memorial School bad ka Nongkharai Presbyterian Higher Secondary School, haba batai ia ka bynta jong ka put ka tem ha ka pynroi ia ka jabieng bad ka sap treikam treijam.
Ula pynkut da kaba ai khublei ia ka Managing Committee, ki Nonghikai, ki Kmie Kpa bad ki Samla Pule namar ka jingaiti jong ki ha ka pule ka dangle.
Kiwei pat kiba la ai jingkren ki kynthup ia u Bah Methodius Dkhar, Myntri ka Tnad Food & Civil Supply, u Rev A Nongbri, President ka Managing Committee ka Skul, Rev SB Lyngdoh Secretary ka Managing Committee bad kiwei kiwei.
Kiba la iadonlang ki kynthup ia u RG Momin, MLA ka Rambrai-Jyrngam, Lurshai Kharbani MDC ka Rambra Jyrngam bad ki Heh Ophisar bad kiwei kiwei.
