Guwahati, Risaw 15: Hadien ka jingkhlad noh u nongrwai ba pawnam ka Assam, ki san ngut kiba la shah kynnoh donkti ba kynthup ia u Shyamkanu Mahanta bad ia u Siddharth Sharma, la phah noh ia ki sha ka judicial custody.
Kiwei pat ki lai ngut ba kynthup ia u Sandeepan Garg bad ar ngut ki personal security officers u Nandeshwar Bora bad u Paresh Baishya la phah noh ia ki sha phatok hadien ka jingkut por noh ka custody jong ki CID.
Ia u Mahanta bad ia u Sharma la wanrah ha khmat ka Chief Judicial Magistrate (CJM) Court ha nongbah Guwahati ha ka sngi Balang ha ryngkat bad ka jingpahara kaba jur na ki pulit.
Ka jingleit mih jong ki ha khmat ka ïingbishar ka la pynkut ïa ka jingshah set hapoh ka custody jong ki CID, ha kaba ki bor pynïaid ain ki la pynneh ïa ka jingpeitngor kaba jur ha ka por ba pynkynriah ïa ki, kaba pynpaw ïa ka jinglong ba khia jong ka case.
U Senior advocate u Mintu Saikia u la pyntip ba ym don uwei ruh na ki nongshah kynnoh uba la pan jamin (bail). Ki tyllong khubor, ki iathuh ba u Mahanta bad u Sharma, ki lah ban shah pynkynriah sha Baksa District Jail ha Mushalpur, wat haba la dep pynbeit shipor, ha Guwahati Central Jail.
Ha shwa ban set ha phatok, baroh 5 ngut ki nongshah kynnoh ki dei ban leh ia ka medical examination ha Pan Bazar Police Station.
Ka CID ka dang bteng ban tohkit ha kaba iadei bad katei ka case, bad la khmih lynti ba kan dang don shuh shuh ka jingtohkit ha ki sngi ban wan.
