Shillong, Risaw 13 : Hadien ka jinglap bomb IED ha Iew Umsning, sa ki paidbah ka thain Rynjah kila her mynsiem hadien ka jingsaphriang ka khubor ba suba buh bomb ha Iew Rynjah ha ka sngi Nyngkong.
Kane ka jingsuba kala mih da ka jingshem ia kawei ka pla kaba la buh hakhmat jong kawei ka dukan ha kane ka Iew.
Ki Pulit haba ioh jingtip ia kane, kila her wut wut ban ker kut ia ka jaka bad la khang ruh ia ki kali ba kin iaid najan kane ka jaka.
Ki Pulit kila khot mar mar ia ka kynhun Bomb Squad ban tohkit bad leh ia kaba donkam. Ka kynhun bomb squad kala tohkit ia kane ka pla bad la shem ba kam dei satia kaba don bomb.
Da kane ka jingshem, ki Pulit kila weng noh ia ka jingker kut bad la shah biang ia ki kali ba kin iaid.
