Shillong, Risaw 12: Ki pulit ka North Garo Hills kila ioh kem ia arngut ki snar nonglute hadien ba ka thuk thuk ba ki tuh, kala ngat ha ka aksiden ha Berubari, kaba hap ha Bajengdoba Police Station.
Kane ka jingjia kala jia haba kane ka thuk thuk ba niah da u Walchang K Sangma bad u Mikserbert Sangma ba shong hadien, kala leit tynrah ia uwei u dieng ha National Highway 51.
Haba ioh ia ka khubor aksiden, ka kynhun ki Pulit kala hiar sha katei ka jaka bad kala lap ia kine ki arngut hapdeng ka jingmynsaw.
Ki Pulit kila pynkit noh mar mar ia kine ki briew sha Bajengdoba Primary Health Centre ban ai jingsumar. Ha ka jingkhmih ki doktor la shem ba kine baroh arngut kila buaid kyiad, kaba lam sha kane ka aksiden.
Ha ka jingtalasi ia ki pla jong kine ki briew, ki Pulit kila lap pynban ia ki tiar pynmynsaw bad kiwei ki mar ba rah da kine ki briew.
Ki Pulit mar mar kila kurup ruh ia kine ki tiar bad kumjuh ruh ia ka thuk thuk ML07-B-7072.
Ki mar bala ioh kurup ki kynthup ia artylli ki suloi dieng, san tylli ki mobile phone, ka wait khukri bad kiwei kiwei.
Ha ka jingtohkit la lap ruh ba u Walchang u dei uba la shah kem teng halor ki kam bymman pyrshah ia ki kynthei bad ula shong haduh 7 snem ha phatok. U Mikselbert ruh u dei uba donkti ha ki kam rahbor.
Kine ki arngut kila iasuhbuit ruh ban leh ia shibun ki kam pyntriem hadien ba ki lait na phatok bad kila iakynduh paralok ruh ha District Jail ha Tura.
Kila phla ba kila tuh ia lai tylli ki mobile phone na kawei k abos bad ka thuk thuk na Rongmil, East Garo Hills District.
“U Walshang ula phla ba ia ki suloi dieng, kaba ki iarah, la shna da ma u hi ha ka iing jong ka Kmie Ieid kaba don ha RC Tura. Ula shna ia kine ki suloi ban pyntieng ia ki briew haba leh ia ka kam bymman” ong ki Pulit.
Ki Pulit kila register case pyrshah ia kine ki arngut ha ki kyndon bapher bapher ka ain bad ka jingtohkit mynta kala iaid shakhmat.
