Shillong, Risaw 10: Ka kynhun ialehkai ka Laitkor SC, ka la sei kat kaba don ka sap ban pynjem khnap ia ka Langsning SC ha ka jingiakhun Shillong Premier League hynne ka sngi Thohdieng ha Polo, hynrei haba kut, ka Langsning kala ioh khur ia ka nam jop 2-1 kol.
Ia ki ar kol ka Langsning FC la thep ia ki lyngba u Nelson Rymbai (14) bad u Chusrang Sangma (18’), hynrei ka kynhun ialehkai ka Laitkor SC kiba juh iai pynpaw ia ka mynsiem iakhun ka bym juh kut, ki la ioh ia ka kabu ban pynphai ia la ka shi kol lyngba u Fridison Wanniang (55’).
Da kane ka nam jop, ka Langsning FC ka la bteng ba kan jam shakhmat sha ka thong ba kan iaknieh ia ka nam kum ka lahduh, da ka jingioh khur 17 point bad sah sa artylli ki jingiakhun, ha ka juh ka por ba kan tam da 2 point ia ka kynhun ialehkai ka Shillong Lajong FC bad Mawlai SC.
Katba ka Laitkor SC kan dang neh ha ka kyrdan kaba 7 mar ia ryngkat bad ka kynhun ialehkai jong ka Mylliem.
Haba phai sha kane ka jingiakhun, khyndiat ka la buh jingeh ia ki player jong baroh ki arkynhun ban sei madan ia katta ka buit ka sap bad ka jingtbit ialehkai ka jong ki, hadien ba sa shisien ka madan kam shim la ailad ia ki hadien ka jingwan ban ther u slap naduh ba sdang kane ka jingiakhun.
Wat la katta ruh, na ka liang ka kynhun ialehkai ka Langsning ka la kham kyntiew ia la ka rukom ialehkai ka jong ka, kampher ba ka la don ki khep ba ka la duh ia ki kabu ksiar ba ka la ioh ban pynurlong ia ki sha ki kol, tad haduh ka khyllipmat ka kol kaba nyngkong lyngba u Nelson, ia kaba ym slem hadien kane, ka la dei pat ka khep ia u Chusrang, ba un ioh ia ka kabu kaba paka ban khyrwit jam bha ia ka bol ban lah ban pynkhih biang sa shisien ia ka jar.
Hadien kane, u slap ula sdang ban bteng ha kaban ther kham tyngeh, kaba la nang buh jingeh bha ia ki player ban lah ialehkai ha ka rukom kaba dei, hynrei ha shwa ban wan ban bteng ia ka kylla miet, u slap u la kham duna, bad hangne ka la plie lad ia ka kynhun ialehkai ka Laitkor ba kan sdang ban kyntiew ia ka rukom ialehkai ka jong ka tad haduh ba kan da ioh ba kan thep ia kane ka shi kol Fridison Wanniang.
Lashai ka sngi ka jingiakhun ha kane ka lympung kan long hapdeng ka Mylliem pyrshah ia ka Nangkiew Irat kaban long ha ka por 4:30 nohphai sngi.
