Assam | Kynthoh tyngeh u Gaurav Gagoi ba tohkitt kyrkieh ka Sorkar halor ka jingiap u Zubeen Garg

Guwahati, Risaw 10: U Nongialam ka Congress bad President ka Assam Pradesh Congress Committee (APCC) Gaurav Gogoi u la kynthoh tyngeh ia ka sorkar jylla halor ka rukom tohkit halor ka jingkhlad u Zubeen Garg, da kaba kynnoh ba ki pulit ka Assam ki leh kyrkieh ban kem ia ki briew khlem da tohkit janai.

“Haba mih kum kine ki jingkynnoh, ka dei ka kamram jong ki Pulit ka Assam ban pynthikna ba ki sakhi sabut kin lah ban ieng ha ka ïingbishar,” ong u Gogoi ha ka jingïalang bad ki nongthoh khubor ha Rajiv Bhawan ha Guwahati ha ka sngi Thohdieng.

“Na ka bynta ki jingkynnoh kum ka jingpyniap briew ne ka jingkynnoh ba donkti ban pyniap briew, ka jingtohkit ka dei ban long kaba bniah bad kaba khlem shah liang.Kaba sngewsih ba kata kam shym la jia. Ha ka jaka jong ka, ngi la iohi ia ki jingkem kyrkieh bad ka jingbym don ka jingtohkit kaba lah ban ngeit.”

Haba pynshai ïa ka jingkynnoh u Myntri Rangbah ka jylla u Himanta Biswa Sarma ba ka Congress ka pynlong politik ïa kane ka case, u Gogoi u la ong, “Ngim leh politik — ngi wad ïa ka hok. Ka jingpyrshang ka jong ngi ka long ban pynneh pynsah ia ka jingnoh synniang jong u Zubeen da bad ban buh ia ki paidbah ka Assam hapdeng ka jingiatylli ha ka jingieit kajong ki bad ban burom ia u.Ki khun samla jong ka Assam mynta kila sdang ban sngewthuh ia ka jingmut bad ka jingpyrkhat jong u Zubeen Da kaba kham jylliew.Nga kyntu ia baroh ban peit ia ka ‘Roi Roi Binale’ ynda ka la pyllait bad ban rakhe ia ka jingnoh synniang jong u sha ka kolshor jong ki nong Assam.”

Haba kob ïa ka jingkam ka BJP ba la dep pynpoi ïa ka hok, u nongïalam ka Congress u la ong, “Hato u Myntri Rangbah ka Jylla u pyrkhat ba ki paidbah ka Assam kim sngewthuh ïa ka aiñ? Ka hok kan wan tang lada kiba ha iing jong u Zubeen Garg, bad khamtam eh ka Garima Garg, ba kan ong ba kila ioh pdiang ia ka. Hynrei haduh kata, ia kaei kaei ba kam da ka BJP, ngin ym lah ban pdiang ba ia ka hok la dep ban ai.”

U Gogoi u la kren ia kane, ha ka prokram jong ka jingwan pynïasoh paidbah ha Rajiv Bhawan, ha kaba palat 100 ngut ki nongïalam na ki seng saiñ pyrthei bapher bapher bad katto katne ngut ki social activists kiba la pynïasoh bad ka Indian National Congress ha shwa ka elekshon sha ka Ïingdorbar Assam ha u snem 2026.

Haba pynpaw ïa ka jingnang kiew ka jingkyrshan jong ka Congress, u Gogoi u la ong, “Ha une u bnai ba la dep, u MLA barim u Virendra Sehtiya bad wat ki nongïalam ka BJP kiba la duh jingkyrmen ïa ka rukom trei kam mynta ki la ïasoh bad movement ka jong ngi.Kaei ba ai mynsiem eh ka long ba ki samla jong ka Assam — bad ki briew kiba ïadei bad ki kam ha ka imlang sahlang — ki sdang ïa ka jingïaid lynti ha ka saiñ hima sima bad ka Congress.Kane ka pyni ia ka lynnong ba thymmai jong ka jingkyrmen na ka bynta ka jylla.”