Imphal/Shillong, Risaw 10: U Myntri Rangbah ka Jylla Conrad K Sangma ula pynshai ha ka sngi Palei ba ka Sorkar Meghalaya kam shym la don bynta eiei ruh em ha ka jingpynpra ia ka jingtei bala rim bha-ka Red Land Building ha Shillong-ka jingtei kaba la niew kor bha khamta da ki paid Manipur.
Haba kren sha ki lad pathai khubor, u Conrad ula pyntip ba la pyntip sha u halor kane ka jingpynpra tang ha ka step shuwa ba un iakynduh ia ki nongthoh khubor bad mar mar ula phone ia ki Ophisar ha ka Tnad Urban Affairs. “La pyntip sha nga ba ka Tnad ka khlem ai jingbit satia ban pynpra ia kane ka jingtei” ula ong.
U Myntri Rangbah ula bynta ba kino kino ki jingbit ba la ai ka long ia kiwei pat ki jingtei ba markhap ym ha ka jaka ba ieng ha Red Land Building.
Ka Red Land Building ka bat ia ka jingmut kaba jylliew ha ka histori bad ka jingsngew, khamtam ha ka jinglong jong ka jingkylla ha ka sain pyrthei bad ka kolshor jong ka synshar khadar ha ka thain. Kane ka jingpynpra ka la pynmih ia ka jingsngewkhia hapdeng ki paidbah bad ki sengbhalang, khamtam na Manipur, ha kaba la iohi ia katei ka jingtei kum shi bynta jong ka jingkynmaw bad jingithuh lang .
U Conrad ula ban jur ba kam don satia kano kano ka agency ha ka Sorkar Meghalaya kaba donbynta ha ka jingpynpra ia kane ka jingtei bad kaei kaba paw ka pyni ba ia ki kam baroh la leh beit da ki bor Sorkar na Manipur. “Ngi ju iengskhem ha ka nongrim ba ngin pynneh ia ki jingtei kiba la rim” ula ong haba kular ba un sa buddien dalade ia kane ka kam bad un sa shong bishar ia ki kot ki sla, ki hukum bad ki shithi ba iadei bad kane ka jaka.
U Conrad ula pynpaw ia ka jingsngewsih halor kane ka jingjia bad ong ba lada donkam, ka Sorkar kan leh ia kaba donkam khnang ban pynthikna ba kum kine ki jingtei ba sah khana kin ioh jingiada hadien habud.
