Pynrem jur ka HYC ia u DyCM ba bynshet kylla ha ki Kmie Kpa ia ka jingshngain ki Khynnah

Shillong, Risaw 10: Ka Hynniewtrep Youth Council (HYC) ha ka sngi Thohdieng, kala kynthoh tyngeh ia u Symbud Myntri Rangbah ba khmih iaka tnat kam pohiing (Police) Bah Prestone Tynsong namar ka jingkynnoh bynshet kylla ha ki kmie ki kpa ban iada bad ai jingshngain iala ki khun.

Ha ka kyrwoh ka HYC ka la pynpaw ba ki jingkren jong u Symbud Myntri Rangbah ki long kiba “bym don ka jingkitkhlieh, ki ktien ba kren khlem ka jingsngewthuh, bad kaba pynkyndit” bad ki bym iahap bad ka kyrdan kaba u bat ban khmih ia ka shongsuk shongshngain.

Ka HYC ka pynpaw ia ka jingsngewsih daka ba ong ba ha ka jaka ban pan jingiatreilang na baroh ki liang u Symbud Myntri Rangbah u khynniad kylla shaki nongshong shnong ka Jylla.

“Ngi pynrem ïa ka jingkren ba la kren bad ïa u briew uba la kren ïa ka bad ngi kwah ban pynkynmaw ïa u Symbud Myntri Rangbah ba ka dei ka kamram jong ka Sorkar Jylla ban pynthikna ïa ka jingshngaiñ jong ki nongshong shnong bad lada ka Sorkar kam lah ban ai jingshngain kam don hok shuh ban synshar iaka Jylla” kynnoh ka HYC.

Ka HYC ka kdew ba ki paidbah ka Jylla ki im ha ka jingtieng, jingsyier bad jingsngewsih hadien ki jingshah pyniap ki khynnah ba dang shen, bad kaei kaba ki dawa ka long, ka jingpynthikna na ka Sorkar ba ki khun jong ki kin lait na ki jingma bad ba ki nongleh kam sniew kin shah pynshitom katkum ka ain.

Ka HYC ka la pynkynmaw ruh ia u Symbud Myntri Rangbah ba ka tnat pulit ka dei ka bynta jong ka jingsynshar, bad ki paidbah kim lah ban shim ia ka ain ha la ki jong ki kti. “Hynrei lada ka Sorkar ka sngew ba ka jinglong jingman jong ka ain ka long shabar ka bor jong ka, te lehse ka dei ban pyrkhat ban aiti ia ka kam pulit sha ki paidbah nongshong shnong” kala ong.

Ka Council ka kyntait ruh iaka jingai jingmut jong u Symbud Myntri Rangbah ba ki kmie ki kpa ki dei ban sumar bad peitngor ia ki khun, da kaba pynpaw ba ym baroh ki kmie ki kpa ki don ia ka por ban buddien ia ki khun 24/7, khamtam ki kmie ki kpa kiba hap ban bylla ban pyndap pynbiang hala iing.

“Kumta, ban ong ïa ki kmie ki kpa ba kin peitngor bad sumar ïa la ki khun namar ka jinglong jingman kam biang hapoh ka Jylla ka dei ka jingpyrshang jong ka Sorkar ban kyntait iala ka jingkitkhlieh, ban duna ki kam pyntriem khnang baka Sorkar kan ïoh ïa ka burom” ka la ong.