Elekshon GHADC | Pynkhreh ka BJP ban sei ia ki kyrtong | Kwah pynshai ka Sorkar ia ka song jingiarap

Shillong, Risaw 08: U nongaiktien ka Meghalaya Bharatiya Janata Party (BJP) Bah Mariahom Kharkrang u la pyntip ba ka BJP kan sei ia ki kyrtong ban iakhun ha ka elekshon Garo Hills Autonomous District Council (GHADC).

Haba kren shaki lad pathai khubor u Bah Kharkhrang ula ong ba ka elekshon ka long kaba donkam bha namar ba ka samoi treikam jong ka GHADC kaba mynta, kan kut noh ha u snem ban wan.

Haba ia dei bad ka rai jong ka Sorkar Jylla ban iarap siew tulop ia ki nongtrei ka GHADC, u Bah Kharkrang u la pynpaw ia ka jingsngewkhia ba ki District Council ki lah ban don ka jingsyier ia ka jingthmu jong ka Sorkar.

“Lada ka Sorkar Jylla ka kwah ban iarap ia ki District Council, ka dei ban pynshai ia ka nongrim jong ka halor ki jingkynnoh ba ka thmu ban tuklar bad shimti ia ki bor pyniaid ki District Council” ula ong.

U Bah Kharkrang u la ban jur ba lada ka Sorkar kam lah ban pynshai halor ki jingkynnoh, kan long kaba eh ban pyntyllun iaki sienjam baka Sorkar ka thmu ban shim ha ka ban iarap iaki District Council.

Haba iadei bad ka jingpynkhreh ka Party na ka bynta ka elekshon MLA, u Nongaiktien ka Meghalaya BJP u la pynpaw ba ka BJP ka long kaba la pynkhreh bha.

“Ka jingpynkhreh bad ka jingtrei jong ka BJP ka iaid beit shakhmat bad ngim ap ia ka elekshon ba kan long noh ban sdang ban trei iaki kam” u la ong.

U la bynrap ruh ba ka BJP ka la jan dep ban buh ia ki Mandal bad ka la trei shaid shaid ban pynkhreh iaka ilekshon ban wan naduh ba kut ka ilekshon 2023.