Nongpoh, Risaw 08 : Ki Pulit ka Ri-Bhoi District kila ioh bat haduh 200 tylli ki kali kiba pynkhein ia ki ain bad ioh lum kuna haduh T. 8 lak, ha ka jingtalasi kali bala pynlong ha ka miet sngi Ba-ar haduh ka step sngi Balang.
Ia kane ka jingtalasi kali la pynsdang naduh ka por 7 baje mynmiet haduh ka step phyrngap jong ka sngi Balang bad kumba 2500 tylli ki kali, la talasi ha kane ka miet.
Napdeng kine ki kali, haduh 200 tylli la lap ba ki pynkhein ia ki ain ba kynthup ia ka jingbym phong helmet, deng seat belt, ki kot ki sla bala iap, ka jingniah n aka liang bym dei, ka jingniah sted, ka jingniah hapdeng ka jingshoh khaw iang ka kyiad bad ka jingpynkylla beain ia ki jingpynsawa bad kiwei kiwei.
Ka Chief Minister Office (CMO), ka Tnad Meghalaya Police bad ki Bor District ka Nongpoh, kala phah ia ka khubor sha ki nongshongshnong ba pyntip ia kane ka jingtalasi kali, haba buh ka jingkyntu ia baroh ba kin bud ryntih ia ki traffic rules.
Kat kum kane ka khubor la wer ruh da kaba ong “Lada phi shem ia kano kano ka jingpynkhein ain, shon da ka dur bad phah sha ngi ha u nombor 6909300160 (whatsapp). Long ki khmat bad ki skhor jong ngi bad ngin nang trei kham bha shuh shuh”.
“Iarap ia ngi ban iarap ia phi” ong ka khubor na kine ki bor Sorkar haba ai khublei ia ki paralok bad ki nongthoh khubor kiba la iadonlang ban synran ha kane ka jingtalasi kali.
Lah ban kdew hangne, ba kane ka jingtalasi kala jia hadien ki jingjia aksiden kali kiba shyrkhei ha ka surok National Highway-06 namar ka jingniah kali khlem akor ba kynthup ia ka jingniah sted, jingniah kali haba shong khawiang bad ka jingniah sha ka liang ka bym dei.
