Shillong, Nailur 13: U Myntri Rangbah ka Jylla Conrad Kongkal Sangma hynne ka sngi ba-ar ula pyntip ba ka kam kala iaid mynta ban sa thung briew noh ha palat 1301 tylli ki kam ba lait thylli kiba dang sahkut hapoh ka Meghalaya Public Service Commission (MPSC).
U Myntri Rangbah ula pyntip ia kane haba jubab ia ka jingkylli bala wanrah da u MLA ka Mawlai Bah PT Sawkmie uba la pynpaw ia ka jingsngewkhia halor ka jingpynslem ka MPSC ban khot ia ki interview thungkam.
“Ka kam kala iaid ban thung briew noh ha kine ki kam ba lait bad nga kular ba ngin pynthikna ba ka MPSC kan pynlong kham kloi noh ia ki eksam bad ki interview thungkam” ong u Conrad hapoh ka Iingdorbar.
Haba u MLA ka Mawsynram Bah Himalaya Shangpliang ula kylli halor ka jingslem ban pynlong ia ka eksam thungkam ha ka kam Enforcement Inspector bad ruh ha kiwei ki kam ba lait thylli ha Jylla, u Myntri Rangbah ula ong ba ka Jylla kala mad ia ki katto katne ki jingeh ha kine ki 2-3 snem bala leit noh namar ka jingwan lynshop ka khlam Covid-19.
“Kane ka dei ka daw ba buh jingeh ia ka MPSC bad ka jingpynlong ia ki eksamin thungkam ka dei ka kam kaba khia bha bad namar kata, ym shym la lah ban pyndap briew ha ki kam ba lait. Nalor kane, ka don ruh ka hukum ka Iingkashari ban pyntreikam iaka Roster System ha kaba la bthah ia ki Tnad ba kin bud bad haba kila leh ia kane, kila lah ban pyniaid shakhmat ia ka jingthungkam” ong u Conrad.
Ha kajuh ka por, u Myntri Rangbah ula pyntip ba ka Sorkar Jylla ka dang shong bishar ia ki jingtyrwa ban pynwandur thymmai ia ka jingtreikam ka MPSC hapoh ka Jylla.
“Hynrei, ngim pat shim satia ia ka rai namar kine ki jingtyrwa ki donkam ia ka jingiatai kaba bniah bha” ula ong.
U Conrad ula pyntip ba kine ki jingtyrwa ki kynthup ia ka jingpynjanai ha ka rukom pyndonkam ia ki kor ka juk bad ban pynlong ia ka Common Examination ia baroh ki kam ba lait kiba dei ia kajuh ka kyrdan pule bad kajuh ka tulop nalor ban buh ruh ia kham bun ki Examination Centre-ia kiba dang shong bishar mynta da ka Sorkar.
U Conrad ula pyntip ba kala don ruh ka jingai jingmut ban wanrah noh ia ka Meghalaya Combined Competitive Exam Rules.
“Ngi la iakren ha ka jingialang ba dang shu dep jong ka Kynhun Myntri halor ka Common Examination ia ki kam ba lait kiba dei iakajuh ka kyrdan pule bad ka tulop namar kane kan iarap ban nym shim por ha kaban khot ia ka eksam hynrei kum kine ki sienjam ba rit ngi don kam ban iatai bha namar ngi hap ban bud ia ka Rules khnang ba kan nym don ka jing iatakhuh lada jia ba don ki nongleit mudui mukotduma. Ngi la phah ia kane ka jingtyrwa sha ka Tnad ba kan bishar biang hadien ba ngi la pynkylla ia ki jingtyrwa kat kum kaba ngi la iakren” ong u Conrad.
U Myntri Rangbah u pyntip ba ka Sorkar Jylla kala kut jingmut shisha ban wanrah ia ka jingkylla ha ka rukom treikam jong ka MPSC.
