Shillong, Nailur 13: U Myntri Sorkar ba khmih ia ka Tnad Legal Metrology Bah Renikton Lyngdoh Tongkhar ula sah ha ka umdum hynne ka sngi ba-ar namar ka jingshah kylli jingkylli ha ka MLA ka AITC na Mahendraganj Dikanchi D Shira, ka bym don jingiadei satia bad ka kam ba u dei khmih.
U Myntri Rangbah ka Jylla Conrad Kongkal Sangma ula hap ban tuklar ban kular ba un sa wad jingtip ba kumno kane ka jingkylli jong ka MLA ka AITC ka poi sha ka tnad ka bym dei khmih.
Ka Dikanchi D Shira ka kwah ban tip la ka don ne em ka Weighbridge bala pynieng ha surok iakhaii pateng ha Mahendraganj. Hynrei, kane ka jingkylli kala poi sha ka Tnad Legal Metrology ha ka jaka jong ka Tnad Transport.
Haba u Myntri ka Tnad Legal Metrology Bah Renikton ula jubab ba kam don, ka Shira kala kdew ba lada kam pat don ka jingpynieng ia ka weighbridge, kumno la thew pat ia ki trok kit mar ban pynthikna ba kan nym don ka jinglait tuh ka khajna.
Kane ka MLA kala kynnoh ba palat spah tylli ki trok ba kit palat pud kila iaid lyngba ka Mahendraganj Port bad bun kine ki trok ki dei kiba la ioh ia ka transit pass ba 12 metric ton hynrei kila kit pat haduh 30-40 metric ton u maw.
Halor kane, u Bah Renikton ula ong ba ka kam ba iadei bad ka jingpynieng ia ki weighbridge kam hap satia hapoh u pud ba khmih da ka Tnad jong u.
“Ngim don bynta eiei ruh em ban tuklar ia kane namar ngim pat ioh pdiang ia ka application ban pynshisha ne stamp ha ki weighbridge ha Mahendraganj” ula ong.
Haba sngewkhia ia kane ka jingbakla, u MLA ka Rangsakona Zenith Sangma ula kylli ba mano ba donkti ha kaban ai ia kane ka jingtip hapoh ka Iing haba kynnoh ba ka sorkar kala pyrshang ban thet kti ia ka jingbahkhlieh.
Halor kane, u Myntri Rangbah ula ong ba ka jingkylli ka dei kaba la phah sha ka Tnad Legal Metrology bad dei namar kata ba u Myntri ula ai ia ka jubab kumba ka long.
Hynrei ula ong ba ka dei ka Tnad Transport kaba dei khmih ia kane ka kam. “Nga ai jingmut ia baroh ki Dkhot ba ia ki jingkylli dei ban phah sha ki Tnad kiba dei ban khmih ia ki. Namar kata, kane ka jingkylli ka dei kaba la phah sha ka Tnad ka bym dei” ula ong.
Haba ka Dikanchi kala pynshai ba ha ka jingshisha kala phah ia kane ka jingkylli sha ka Tnad Transport bad kam don jingtip ba la phah pat sha ka Tnad Legal Metrology, u Myntri Rangbah ula ong ba lada ka long kumta, un sa wad bniah namar ka Tnad Transport ka dei ban ai jubab ia kane ka jingkylli.
U Conrad ula kular ruh ia ka Dkhot ba ka Sorkar kan sa shong bishar halor ka jingdonkam ban pynieng ia ka weighbridge ha Mahendraganj.
