Shillong, Oct 3: Ka Bright Future SSCC, Young SSCC bad Diengshynrum SC ha ka sngi Palei kila khur ia ka jingjop ha ka jingiakhun ha ka Meghalaya Women’s State League 2025 bad baroh kitei ki kynhun kila jop da 2-0.
Ha ka Group B kaba la long ha Madan Mawlum Tyrsad, ka Bright Future SSCC (jongka Pyndengumiong District Sports Association) kala pynrem ia ka Mawten SC (jongka Mawkyrwat District Sports Association) hashwa ba ka Young SSCC (jongka PDSA) kan pynliem ia ka Mawsawrit SC (jongka Tyrsad Area Sports Association).
Ha ka Group C, ka Diengshynrum (jongka East Jaintia Hills District Football Association) kala pynrem ia ka Chirupheiwi Nongkynrih FC (jongka Laskein Block Sports Association) ha Laskein.
Ka Banrisha Kyrsain kala thep ia ka kol ha ka 20 minit bad ka Lavina War kala thep ia ka kol ha ka 68 minit ba ka bynta ka Bright Future.
Ka R Syiemlieh kala thep kol ha ka 9 minit bad ka J Ryntathiang kala thep ia ka kol ha ka 11 minit na ka bynta ban pynthikna ba ka Young SSCC kan khur ia ka jingjop.
Katba ka Diengshynrum kala khur ia kaj ingjop lyngba ka Charlinda Nongtdu kaba la thep 2 tylli ki kol ha ka 70 bad 80 minit.
Ka jingialehkai football ha Tyrsad kala long kaba eh bha namar ka jingslap jur bad ka jingdon u lyoh hynrei ki nongialehkai kila pyni pat ia la ka sap ka phong bad kam shym la pynsangeh ia ka mynsiem iakhun ka jongki ban ioh khur ia ka jingjop.
Ka Tyrsad Area Sports Association kadei ka synjuk ialehkai kaba la bna nam na ka bynta ban kyrshan ia ka jingialehkai football ki kynthei bad kadei ka District Association kaba ju pynlong man la ka por ia ka jingiakob ialehkai football ki kynthei. Ha kaba bun ngut ki nongialehkai kila mihkhmat ia ka jylla Meghalaya ne kiba la leit ban ialehkai noh na kiwei pat ki Club kiba don ha kylleng jong kane ka ri kidei kiba la ialehkai teng ha ka jingiakob ialehkai football kaba la pynlong da ka TASA.
Ka jingiakhun ha ka sngi Saitjain:
Group A – Na Rympei Football Academy pyrshah ia ka Pay For Right Football Academy, ha ka por 10 baje mynstep ha SSA Stadium Shillong
Group B – Ka Young SSCC pyrshah ia ka Mawten SC, ha ka por 12 baje mynsngi ha Mawlum Tyrsad Ground
Group B – Ka Mawsawrit SC pyrshah ia ka Mawlum Tyrsad SC, ha ka por 2:30 mynsngi ha Mawlum Tyrsad Ground
Group C – Ym don kano kano ka jingiakhun
